ცენტრალურმა საარჩევნო კომისიამ, 3 აპრილს გამართულ სხდომაზე, კენჭისყრის ელექტრონული საშუალებების გამოყენებით ჩატარების წესისა და პირობების განსაზღვრის შესახებ და ზოგიერთი საარჩევნო პროცედურის განსაზღვრის შესახებ საქართველოს ცენტრალური საარჩევნო კომისიის დადგენილებაში ცვლილებები შეიტანა.
კერძოდ, ცესკოს ახალი დადგენილებით, დამკვირვებლებს ამომრჩევლისთვის პირადობის ჩვენების მოთხოვნა და ვერიფიკაციის აპარატის მონაცემების დამუშავება ეკრძალებათ, მედიისთვის იზღუდება უბნებზე ფოტო/ვიდეო გადაღება.
ახალი დადგენილების თანახმად:
“კენჭისყრის შენობაში ყოფნის უფლების მქონე ნებისმიერი პირის მიერ დაუშვებელია:
- კენჭისყრის ოთახში ამომრჩევლის გადაადგილების შეფერხება;
- ამომრჩევლის პირადობის დამადასტურებელი დოკუმენტის ჩვენების მოთხოვნა, მათ შორის, გამორთმევა;
- ამომრჩევლის პირადობის დამადასტურებელი დოკუმენტის, ამომრჩეველთა ვერიფიკაციის აპარატზე გამოტანილი ამომრჩევლის მონაცემების, ამომრჩეველთა ვერიფიკაციის აპარატიდან ამობეჭდილი ამომრჩეველთა ვერიფიკაციის დამადასტურებელი ქვითრისა და ამომრჩევლის მიერ საარჩევნო ბიულეტენზე გაკეთებული არჩევანის ფოტოვიდეოგადაღება ან სხვაგვარი დამუშავება.”
ასევე, ცვლილებებში საუბარია მედიის შესახებაც:
“ერთი და იგივე პრესისა და მასობრივი ინფორმაციის სხვა საშუალების წარმომადგენელს უფლება აქვს, ერთ საარჩევნო უბანზე ფოტო-ვიდეოგადაღება ერთხელ აწარმოოს არაუმეტეს 10 წუთისა. თუ აღნიშნულ წარმომადგენელს აქვს სურვილი, ფოტო-ვიდეოგადაღება აწარმოოს 10 წუთზე მეტი ხნის განმავლობაში, მაშინ ის ვალდებულია, დაიკავოს კენჭისყრის შენობაში კომისიის თავმჯდომარის მიერ გამოყოფილი სპეციალური ადგილი”
ახალ დადგენილებას ხელი ცესკოს თავმჯდომარემ გიორგი კალანდარიშვილმა მოაწერა. დადგენილებები 3 აპრილს, გამოქვეყნებისთანავე ამოქმედდა.
Loading ...