დაკავებულია “ქურდულ სამყაროსთან” დაკავშირებული 44 პირი, კიდევ 6 პირს ბრალი წარედგინება – შსს

შინაგან საქმეთა სამინისტროს ცნობით, დააკავეს “ქურდულ სამყაროსთან” დაკავშირებული 44 პირი, კიდევ ექვსს კი ბრალი დაუსწრებლად წარედგინება.

შს მინისტრის მოადგილემ, ალექსანდრე დარახველიძემ ბრიფინგზე განაცხადა, რომ ბრალდებულები აწყობდნენ ე.წ. “ქურდულ გარჩევებს” და გამოჰქონდათ ე.წ. “ქურდული გადაწყვეტილებები.” ისინი უკავშირდებოდნენ ქურდული სამყაროს წარმომადგენლებს, მათ შორის ე.წ. “კანონიერ ქურდს” მამუკა შუბითიძეს, რომელიც იღებდა გადაწყვეტილებებს და სანაცვლოდ თანხას ითხოვდა. ვადებიდ დარღვევის შემთხვევაშ კი ემუქრებოდა ფიზიკური ანგარიშსწორებით და სიცოცხლის მოსპობით.

“საქართველოს შინაგან საქმეთა სამინისტროს თანამშრომლები უწყვეტ რეჟიმში აგრძელებენ ორგანიზებულ დანაშაულთან და განსაკუთრებით ე.წ “ქურდულ სამყაროსთან” დაკავშირებული დანაშაულებრივი საქმიანობის წინააღმდეგ ბრძოლას.

გასული დღე-ღამის განმავლობაში, სამართალდამცავების მიერ, ქვეყნის მასშტაბით ჩატარებული მორიგი წარმატებული საპოლიციო ღონისძიების შედეგად, მოსამართლის განჩინების საფუძველზე, “ქურდულ სამყაროსთან” კავშირში მყოფი 44 პირია დაკავებული. კიდევ 6 პირს ბრალი დაუსწრებლად წარედგინება, მათ შორის ერთი, საზღვარგარეთ მყოფი ე.წ. კანონიერი ქურდია.

სამართალდამცავების მიერ, ინტენსიურ რეჟიმში ჩატარებული ფარული საგამოძიებო მოქმედებების შედეგად დადგინდა, რომ სისხლის სამართლის დანაშაულში ბრალდებული პირები აწყობდნენ ე.წ. “ქურდულ გარჩევებს” და გამოჰქონდათ ე.წ. “ქურდული გადაწყვეტილებები.”

დაკავებულები უკავშირდებოდნენ ქურდული სამყაროს წარმომადგენლებს, მათ შორის ე.წ. “კანონიერ ქურდს” მამუკა შუბითიძეს, რომელიც პირადი სარგებლის მიღების მიზნით, ე.წ. “ქურდული წესების” შესაბამისად, მოქალაქეებს შორის არსებული ფინანსური და სხვა კრიმინალური სახის დავებზე იღებდა გადაწყვეტილებებს, რის შემდეგაც მხარეებს თანხის გადახდას აკისრებდა. კონკრეტული ვადების დარღვევის შემთხვევაში კი, ფიზიკური ანგარიშსწორებითა და სიცოცხლის მოსპობით ემუქრებოდა.” – თქვა დარახველიძემ.

გარდა ამისა, ბრალდებულები ე.წ. კანონიერ ქურდს აწვდიდნენ ინფორმაციას თბილისსა და კახეთიში მცხოვრები იმ პირების შესახებ, რომლებისგანაც შეიძლებოდა მატერიალური სარგებლის მიღება.

“გამოძიებით ასევე დგინდება, რომ ბრალდებულები ე.წ. კანონიერ ქურდს პერიოდულად აწვდიდნენ ინფორმაციას თბილისსა და კახეთის რეგიონში მცხოვრები იმ პირების შესახებ, რომლებისგანაც შემდგომში შესაძლებელი იქნებოდა, “ქურდული სამყაროს” სახელით, მატერიალური სარგებლის მიღება და ფულის გამოძალვა.

ჩატარებული ოპერატიული ღონისძიებების შედეგად, ნივთმტკიცებად ამოღებულია ავტომანქანა, ცეცხლსასროლი იარაღები და საბრძოლო მასალა, ასევე ბრალდებულების მობილური ტელეფონები და კომპიუტერული ტექნიკა, რომელთა საშუალებითაც ისინი ერთმანეთს და უცხოეთში მცხოვრებ ქართველ ე.წ. “კანონიერ ქურდს” უკავშირდებოდნენ.

გამოძიება საქართველოს სისხლის სამართლის კოდექსის 181-ე, 223-ე პრიმა, 223-ე ტერცია და 223-ე კვარტა მუხლებით მიმდინარეობს, რაც 15 წლამდე ვადით თავისუფლების აღკვეთას ითვალისწინებს.” – განაცხადეს ბრიფინგზე.