ქართულ ფეხბურთში ჩაწყობილი თამაშები უცხო არავისთვისაა და არც იმის თქმა იქნება სიახლე, რომ ამ სფეროში ყოველდღე უკან მივდივართ.
თუმცა, “გურია TV”-ის მიერ მოპოვებული ექსკლუზიური ინფორმაცია არაფერია იმასთან შედარებით, რაზეც ეხლა უნდა გიამბოთ _ როგორც წყარო გვეუბნება თამაშების მოგება/წაგების საკითხს ქვეყნის გარეთ მყოფი ე.წ. კანონიერი ქურდები აგვარებენ.
წყარო გვიყვება, რომ დეკემბრის დასაწყისში, მეორე ლიგაში მოასპარეზე ლანჩხუთის “გურიასა” და მესამე ლიგაში მოთამაშე დუშეთის “არაგვს” შორის გასამართი პლეიოფის შედეგი უკვე გარკვეულია და ორივე თამაში “გურიამ” უნდა მოიგოს, მეორე ლიგაში დარჩეს და ამით ე.წ. კანონიერმა ქურდებმა ფული უნდა მოიგონ:
_ ის რომ პლეიოფში “გურია” და “არაგვი” ერთმანეთს შეხვდებოდა დიდი ხნის წინ გადაწყა. სავარაუდოდ, წინასწარ იზრუნა ვიღაცამ ამაზე. ახლა იმაზე მუშაობენ, რომ ორივე მატჩი “გურიამ” მოიგოს. ამ თამაშებზე დიდ ფულს დებენ საზღვარგარეთის ტოტალიზატორებში. უფრო მეტს გეტყვით, “გურიას” პრეზიდენტი კახა ებრალიძე ცოტა ხნის წინ კრიმინალურმა ავტორიტეტებმა ჯერ თურქეთში, შემდეგ კი უკრაინაში დაიბარეს და უთხრეს, რომ ყველაფრის ფასად ეს თამაშები უნდა მოიგოს.
გააფრთხილეს, რომ მისი ფეხბურთელები არ უნდა “დაიკერონ” და რომ ფეხბურთის ფედერაციაში ყველაფერი გარკვეულია, რომ მსაჯები მათკენ იქნებიან და დანარჩენი უკვე მათი მოსაგვარებელია. ებრალიძე მკაცრად გააფრთხილეს, რომ ეს თუ ასე არ მოხდება თვითონაც და ფეხბურთელებიც მკაცრად დაისჯებიან, _ გვიყვება წყარო.
მისივე თქმით, ამ ყველაფრის უკან ფეხბურთის ფედერაციასთან დაახლოებული ოზურგეთელი ბიზნესმენი, ილა კეჭაყმაძე კეჭაყმაძე დგას, რომელმაც ებრალიძე ე.წ. კანონიერ ქურდებთან დააკავშირა. წყაროს თქმით, თუ ამ თემით შესაბამისი სამსახურები დაინტერესდებიან მტკიცებულებებსაც ადვილად მოიპოვებენ, რადგან ამის შესახებ ლანჩხუთში უკვე ბევრმა ადამიანმა იცის.
ამ ინფორმაციას კატეგრიულად უარყობს კახა ებრალიძე, რომელმაც 10 წუთიან ინტერვიუში რამდენიმე ურთიერთგამომრიცხავი კომენტარი გააკეთა _ თავდაპირველად გვითხრა, რომ ბოლო პერიოდში არც თურქეთში ყოფილა და არც უკრაინაში. მას შემდეგ კი, რაც ვუთხარით, რომ მის საზღვრის კვეთის დოკუმენტი გვქონდა, თქვა რომ თურქეთში არა, მაგრამ უკრაინაში იმყოფებოდა პირად საქმეზე.
_ არასდროს მქონია შეხება კრიმინალებთან და არ მესმის რას ამბობთ. რამდენიმე საათის წინ გადაწყდა, რომ “გურია” და “არაგვი” ერთმანეთს შეხვდებოდნენ პლეიოფში და რამდენიმე დღის წინ როგორ დავიწყებდით რაიმეს მოგვარებას, _ ამბობს ებრალიძე.
_ ბატონო კახა, ის რომ “გურიას” არაგვთან” უწევდა შეხვედრა და რომ ამ თამაშით კრიმინალური ავტორიტეტები იყვნენ დაინტერესებულნი ჩვენ 2 კვირის წინ ვიცოდით და ამ თემაზე მუშაობა მაშინვე დავიწყეთ…
_ ეგრე არ ხდება. წინასწარ ვერ გაიგებდით…
_ დაზუსტებული ინფორმაცია გვაქვს, რომ დიდი ხანია ეს ამბავი გარკვეულია, რაც იმას ნიშნავს რომ სავარაუდოდ, სხვა თამაშებიც ჩაწყობილი იყო…
_ მე არ მაქვს ეს ინფორმაცია…
_ თამაშების ჩაწყობა რომ ხდება ეს არ იცით?
_ ჩემთან არ ხდება…
_ არც ისე დიდი ხანი გავიდა მას შემდეგ, რაც ლანჩხუთის “გურიას” ფეხბურთელი ჩაწყობილი თამაშებისთვის დააკავეს… უფრო ადრე, ლანჩხუთელმა მსაჯმა თავი მოიკლა და ესეც ჩაწყობილ თამაშთთან დაკავშირდა…
_ მერე მე რა შუაში ვარ მაგ ამბავთან… მაშინ ფეხბურთთან შეხება არ მქონია…(არადა, გურიას” ფეხბურთელები მიმდინარე წლის გაზაფხულზე დააკავეს და ებრალიძე მაშინაც კლუბის პრეზიდენტი იყო.ავტ.)
_ შეგიძლიათ თამამად გვითხრათ, რომ ახლა თამაშები არ “კეთდება” და თუნდაც თქვენი ფეხბურთელები არ “იყიდებიან”?
_ მე არ მაქვს ეს ინფორმაცია და ვერ გავიგეთ რას იკვლევთ…
_ იმას, ხდება თუ არა თქვენზე და თქვენს ფეხბურთელებზე ზეწოლა, რომ არაგვს” ყველაფრის ფასად მოუგოთ თამაში და ამ თამაშით ვიღაცეებმა დიდი ფული იშოვოს…
_ მსგავს ფაქტს ადგილი არ ქონია.
_ ჩვენი წყარო სხვა რამეს ამბობს და იმასაც გვიყვება, რომ ამ ყველაფერში ილა კეჭაყმაძეა ჩართული…
_ ილა კეჭაყმაძე 5 წლის წინ გავიცანი და ალბათ, 4 წელია არ მინახავს…კონტაქტი არ მქონია..
_ ბატონო კახა, რატომ ცდილობთ მოგვატყუოთ?
_ არ გატყუებთ.
_ თქვენ ილა კეჭაყმაძე არ გინახავთ ბოლო პერიოდში და არ დაკონტაქტებიხართ?
_ არა.
_ ჩვენ რომ საპირისპიროს მტკიცებულება გვაქვს?
_ რას ეძახით თქვენ კონტაქტს.
_ საუბარს, კავშირს…
_ შეიძლება ვესაუბრე, არ მახსოვს ზუსტად, მაგრამ ფეხბურთის თემაზე ნამდვილად არა, _ გვითხრა ებრალიძემ.
ამ ინფორმაციას უარყოფს უილა კეჭაყმაძეც და ამბობს, რომ ფეხბურთან კავშირი არ აქვს. მისივე თქმით, არც ებრალიძესთან ჰქონია კავშირი და არც ე.წ. კანონიერ ქურდებთან.
ჩვენ შევეცადეთ გაგვერკვია რა ინფორმაციას ფლობენ ამ თემაზე დუშეთის “არაგვში”. გუნდის მთავარი მწვრთნელი ლადო ბურდული ამბობს, რომ ეს ამბავია არ სმენია:
_ მე მსგავსი ინფორმაცია არ მსენია. შემიძლია გითხრათ ის, რომ ყველაფერს გავაკეთებთ რომ “დუშეთმა” ისტორია შექმნას. ჩვენ ვითამაშებთ სუფთა ფეხბურთს და თავს არ დავზოგავთ მოგებისთვის. ორივე თამაში პირდაპირ ეთერში გადაიცემა., ჩვენც გადავიღებთ სამი ამერით და ყველა ყველაფერს დაინახავს, _ აღნიშნა ჩვენთან საუბრისას ბურდულმა.
როგორც გავარკვიეთ პირველი თამაში “გურიასა” და “არაგვს” შორის დეკემბრის პირველ რიცხვებში გაიმართება და ამ ყველასთვის საინტერესო მატჩს დუშეთი უმასპინძლებს.
ნატო გოგელია
სპეციალურად “გურია TV”-სთვის.
Loading ...
