დაბნეულობა ოზურგეთში – მწვანე პასპორტთან დაკავშირებული რეგულაციის შესრულებას არცერთი უწყება არ აკონტროლებს

დღეიდან ისევე, როგორც მთელ საქართველოში, მწვანე პასპორტის ქონა მოქალაქეებისთვის სავალდებულო გახდა გურიის რეგიონშიც. ოზურგეთში შესაბამისი დაწესებულებების ნაწილი მზად არის, რომ სტუმრები მხოლოდ მწვანე სტატუსის შემთხვევაში მიიღოს.

ობიექტზე არამწვანე სტატუსის მქონე პირის დაშვებაზე პასუხისმგებლობა ეკისრება დაწესებულებას. წესის დარღვევის შემთხვევაში სანქცია იურიდიული პირისთვის შეადგენს 10 000 ლარს, ინდმეწარმისთვის – 2 000 ლარს. ხოლო ჯანდაცვის სამინისტროს ინფორმაციით, ახალი რეგულაციის შესრულებაზე  მონიტორინგს, შერჩევის პრინციპით, განახორციელებს ჯანდაცვის სამინისტროს შრომის ინსპექციის სამსახური, შსს-ს და შემოსავლების სამსახურის შესაბამისი დეპარტამენტები, ადგილობრივი მუნიციპალიტეტები, სურსათის ეროვნული სააგენტო.

”გურიაTV”-მ მიმართა გურიის სამხარეო ადმინისტრაციას, ოზურგეთის მუნიციპალიტეტის მერიას, საზოგადოებრივი ჯანდაცვის ცენტრსა და სურსათის ეროვნულ სააგენტოს. თუმცა მათგან პასუხი კითხვაზე, თუ ვინ და როგორ გაკონტროლებს რეგიონში მწვანე პასპორტის ქონის საკითხს, ბუნდოვანია. მიუხედავად იმისა, რომ ჯანდაცვის სამინისტროს განცხადებით, ზემოთ ჩამოთვლილი თითოეული უწყება დღეიდან უკვე ჩართული უნდა ყოფილიყო მონიტორინგის საკითხში, არცერთ ორგანიზაციას, არა თუ მონიტორინგი არ დაუწყია, ოფიციალური მითითებაც არ მისვლიათ, რომ აღნიშნული ტიპის მონიტორინგი ევალებათ.

გურიის სამხარეო ადმინისტრაციისგან პასუხს ”გურიაTV” მთელი დღის მანძილზე ელოდა, თუმცა კომენტარი დღის ბოლოს გაკეთდა. სამხარეო ადმინისტრაციაში აღნიშნეს, რომ აღსრულება შრომის ინსპექციას ეკისრება, დადგენილებაში ჩამოთვლილ საზედამხედველო ორგანოებთან ერთად. თუმცა მიუხედავად მცდელობისა, გურიის რეგიონში შრომის ინსპექციის წარმომადგენლობის პოვნა ვერ მოხერხდა. ოზურგეთის მუნიციპალიტეტის მერიაში აღნიშნეს, რომ მწვანე პასპორტთან დაკავშირებული მონიტორინგი მათთვის არავის დაუვალებია. იგივე განაცხადეს სურსათის ეროვნულ სააგენტოშიც და აღნიშნეს, რომ არანაირი ოფიციალური მითითება ჯერ არ მისვლიათ.

შესაბამისად, ამ დრომდე უცნობი რჩება გააკონტროლებს თუ არა ვინმე ოზურგეთში დაწესებულებებს, თუ რამდენად ასრულებენ ისინი მწვანე პასპორტთან დაკავშირებულ რეგულაციას. მით უმეტეს, იმის გათვალისწინებით, რომ ახალი წესი უკვე ძალაშია შესული, რეგიონში კი მისი აღსრულების შემოწმება ჯერაც არავის ევალება და ყველაფერი დაწესებულებებისა და მოქალაქეების კეთილსინდისიერებისთვისაა მინდობილი.

შეგახსენებთ, რომ  ”მწვანე პასპორტით” სარგებლობა აუცილებელია:

• კვების ობიექტებში;
• რესტორნების, კაფეების და ბარების ღია და დახურულ სივრცეებში;
• გასართობ ცენტრებში;
• კინოთეატრებში, თეატრებში, ოპერასა და მუზეუმებში;
• საკონცერტო დარბაზებში;
• სამორინეებსა და სათამაშო ბიზნეს-ობიექტებში;
• სპა-ცენტრებში;
• ფიტნეს-დარბაზებში;
• სასტუმროებში;
• სამთო კურორტების საბაგირო გზებზე.

საბავშვო-გასართობ ცენტრებში „მწვანე პასპორტის“ მოთხოვნა მოქმედებს მხოლოდ 18 წელზე უფროსი ასაკის მოქალაქეებისთვის.

”მწვანე სტატუსი“ ენიჭება:

• სრულად ვაქცინირებულ პირს;
• პირს, რომელსაც აქვს 72-საათიანი მოქმედების PCR ტესტის, ან 24-საათიანი მოქმედების „სწრაფი ტესტის“ უარყოფითი პასუხი;
• პირს, რომელიც კორონავირუსით იყო ინფიცირებული.