დაავადებათა კონტროლის ეროვნული ცენტრის გურიის წარმომადგენლობის ხელმძღვანელი არჩილ მჟავია ”გურიის ახალი ამბებში” ნიღბის ტარების აუცილებლობაზე საუბრობს და ამბობს, რომ საქართველოში პირბადის გამოყენების სტატისტიკურმა მაჩვენებელმა ძალიან დაიწია, რაც ცუდის ნიშანია.
”სანამ გურიის რეგიონი მთლიანად გაიხსნებოდა, სკოლებს და ბაღებს ვგულისხმობ, კოვიდით დაინფიცირებულთა ყოველდღიური ციფრი მერყეობდა 30-40 მდე შემთხვევამდე,მაგრამ საერთო ჯამში, სახეზე არის კლება, მაგრამ მდგომარეობა ჯერ კიდევ არ არის დასტაბილურებული და შეიძლება ნებისმიერ დროს გაუარესდეს სიტუაცია.
ამერიკის ჯანმრთელობის გაზომვათა და შეფასების ინსტიტუტი ყოველ ათ დღეში აქვეყნებს მსოფლიო მასშტაბით სტატისტიკას, სტატისტიკა ეხება საქართველოსაც. ამ ინსტიტუტის მონაცემებით, საქართველოში ნიღბების გამოყენება ჩამოვიდა 65%-ზე, მაშინ, როცა ამავე სტატისტიკის მიხედვით წინა პერიოდში საქართველოს მოსახლეობის 78% ატარებდა ნიღაბს. 65% ძალიან დაბალი ციფრია. პოლიციას დაევალა აკონტროლოს ნიღბის ტარება მოქალაქეებში, როგორც ჩანს, ადამიანების დიდი ნაწილი ნიღაბს სწორედ ამიტომ ატარებს, რომ პოლიციამ არ დააჯარიმოს. ამიტომ უკეთიათ ხოლმე ცხვირზე, შუბლზე და ა.შ. ეს არ არის ნიღბის ტარება, ეს არის ვირუსთან თამაში და ასეთი თამაში როგორც მთავრდება, ყველამ ვიცით. მაშინ, როცა ქვეყანაში ჯერ კიდევ არ არის ვაქცინა შემოსული, როცა მსოფლიოს ბევრი ქვეყანა მესამე ლოქდაუნზე მიდის, როგორ შეგვიძლია ასე გაუფრთხილებლად მოვექცეთ საკუთარ და სხვების ჯანმრთელობას?
რაც შეეხება რეკომენდაციებს, დავანებოთ თავი აფთიაქებში ამდენი D ვიტამინის ყიდვას, ამას ის შედეგი არა აქვს, რაც ადამიანები მისი დალევისგან ელიან, ვიაროთ ბევრი ფეხით, ვისეირნოთ სუფთა ჰაერზე და მზეზე, ეს არის ჩვენი D ვიტამინი. ვაქცინაცია რომც დაიწყოს, არ ნიშნავს იმას, რომ პირბადეზე უარი ვთქვათ. აი, ისრაელში უკვე ვაქცინაციის მეორე ეტაპია, მაგრამ შეხედეთ, ნიღაბი არავის მოუხსნია. დავიბანოთ ხელები, დავიცვათ ორმეტრიანი დისტანცია და ვატაროთ პირბადე. ეს ძალიან მნიშვნელოვანია” – განაცხადა არჩილ მჟავიამ ”გურიაTV”-თან.
Loading ...
