დააკავეს სოც.მომსახუერების სააგენტოს თანამშრომელი, რომელმაც კარტრიჯები მიითვისა და გაყიდა

ფინანსთა სამინისტროს საგამოძიებო სამსახურის ცნობით, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს – სსიპ სოციალური მომსახურების სააგენტოს კუთვნილი ქონების სამსახურებრივი მდგომარეობის გამოყენებით მითვისების ფაქტზე, ამავე სააგენტოს თანამშრომელი, გ.ა. დააკავეს.

უწყების ცნობით, ბრალდებულმა სააგენტოს კუთვნილი საქონელი [კარტრიჯები] გაყიდა, რისგანაც 3 472 ლარი მიიღო.

“გამოძიებით დადგინდა, რომ დაკავებული, მატერიალური სარგებლის მიღების მიზნით, მართლსაწინააღმდეგოდ დაეუფლა მის მართლზომიერ მფლობელობაში არსებულ, სააგენტოს კუთვნილ მატერიალურ ფასეულობებს.

ჩატარებული ღონისძიებების შედეგად, გ.ა. დაკავებულ იქნა სამსახურის მისამართზე, მითვისებული საქონლის რეალიზაციისას, რა დროსაც მან მიიღო ფულადი თანხა 3 472 ლარის ოდენობით.

ნივთმტკიცებად ამოღებულია მითვისებული საქონელი და მისი რეალიზაციის შედეგად მიღებული ფულადი თანხა.

ბრალდებულთან დანაშაულებრივ კავშირში მყოფი პირების მხილების მიზნით, ინტენსიურად მიმდინარეობს შესაბამისი საგამოძიებო მოქმედებები” – ნათქვამია განცხადებაში.

ფაქტზე გამოძიება საქართველოს სისხლის სამართლის კოდექსის 182-ე მუხლის მე-2 ნაწილით მიმდინარეობს, რაც ოთხიდან შვიდ წლამდე პატიმრობას ითვალისწინებს.