შსს-ს საგანგებო სიტუაციის სამსახურის ინფორმაციით, „გურიის რეგიონის სამივე მუნიციპალიტეტში მოხალისეთა შერჩევა აქტიურ ფაზაშია“.
ასე უპასუხეს საგანგებო სიტუაციის სამსახურში BMG-ის წერილობით კითხვებს, რომელიც ქვეყანაში მოხალისეთა ინსტიტუტის განვითარების მიმართულებით გადადგმულ ნაბიჯებს და შედეგებს შეეხებოდა.
საქმე ის არის, რომ 2022-2026 წლებისთვის საქართველოს გარემოს დაცვის მოქმედებათა მეოთხე ეროვნული პროგრამა ითვალისწინებს მოხალისეთა ინსტიტუტის განვითარებას. კერძოდ, დარეგისტრირებული უნდა იყოს სულ მცირე 2 000 მოხალისე მთელი ქვეყნის მასშტაბით. ამ საკითხზე პასუხისმგებელი უწყებაა სსდ საგანგებო სიტუაციების მართვის სამსახური. „მსგავსი პრაქტიკა არსებობს და საკმაოდ ეფექტიანად მუშაობს მსოფლიოს ბევრ ქვეყანაში და მიჩნეულია ბუნებრივ კატასტროფებთან ბრძოლის ეფექტიან საშუალებად“, – წერია დოკუმენტში. სამოქმედო გეგმის თანახმადვე, მოხალისეთა ინსტიტუტისთვის განსაზღვრულია წლიური ბიუჯეტიც – 1.3 მლნ ლარი.
საგანგებო სიტუაციების სამსახურიდან მოგვწერეს, რომ მიმდინარე პერიოდისთვის შექმნილია და ფუნქციონირებს სამოქალაქო უსაფრთხოების სფეროს მოხალისეთა ოფიციალური ვებგვერდი − www.volunteers.ge, რომელზედაც მოხალისეობის მსურველი პირი ავსებს რეგისტრაციისათვის განკუთვნილ აპლიკაციის ფორმას და რეგისტრირდება მოხალისედ.
მოხალისეობა ანაზღაურებადი საქმიანობა არაა.
„მოხალისეთა შერჩევის მიზნით, პროექტი „მოხალისე“ განხორციელდა: სამცხე-ჯავახეთში (ბორჯომისა და ადიგენის მუნიციპალიტეტებში); მცხეთა-მთიანეთში (ყაზბეგის მუნიციპალიტეტში); აჭარასა (ხულოს მუნიციპალიტეტში) და სამეგრელო-ზემო სვანეთში (მესტიის მუნიციპალიტეტში).
ამ ეტაპზე მოხალისეთა შერჩევა აქტიურ ფაზაშია გურიის რეგიონის სამივე მუნიციპალიტეტში.
შერჩეულ მოხალისეებს ჩაუტარდა შესაბამისი თეორიული და პრაქტიკული სწავლებები, ასევე გაეცნენ სახანძრო-სამაშველო ტექნიკასა და აღჭურვილობას. შერჩეული მოხალისეებისთვის გადაცემულია შესაბამისი ფორმა და სახანძრო-სამაშველო ავტომობილები სახანძრო-სამაშველო აღჭურვილობით.
„სამოქალაქო უსაფრთხოების შესახებ“ საქართველოს კანონის შესაბამისად, მოხალისეობა არის ამავე კანონით დადგენილი ორგანიზაციული მოწესრიგების ფარგლებში ფიზიკური პირის მიერ საკუთარი ცოდნითა და უნარით, ნებაყოფლობით და უანგაროდ განხორციელებული საზოგადოებრივად სასარგებლო საქმიანობა. ამასთან, მოხალისეთა ეროვნულ სიაში დარეგისტრირებულ პირზე (მოხალისეზე) ვრცელდება „სამოქალაქო უსაფრთხოების შესახებ“ საქართველოს კანონის 62-ე, 65-ე მუხლის მე-2 და მე-3 პუნქტებითა და 66-ე მუხლის პირველი − მე-3 პუნქტებით განსაზღვრული სამსახურის მეხანძრე-მაშველისთვის დაწესებული სოციალური დაცვის გარანტიები“, – წერია წერილობით პასუხში.
საგანგებო სიტუაციების სამსახურიდან ასევე მოგვწერეს, საქართველოში სამოქალაქო უსაფრთხოების სფეროში მოხალისეობის განვითარების მიზნით, საგანგებო სიტუაციების მართვის სამსახური თანამშრომლობს საერთაშორისო ორგანიზაციებთან, მათ შორის საქართველოს წითელი ჯვრის ასოციაციასთან და გაეროს პროექტების მომსახურების ოფისთან (UNOPS).
მოხალისეობრივი საქმიანობის ხელშეწყობის მიზნით, საგანგებო სიტუაციების მართვის სამსახურის წარმომადგენლებმა მონაწილეობა მიიღეს შემდეგ აქტივობებში:
“გაეროს პროექტების მომსახურების ოფისის (UNOPS) მიერ, 2024 წლის 11 – 15 მარტს ბორჯომში და 18 – 22 მარტს ბათუმში ჩატარებულ სწავლებაში, რომლის მიზანს წარმოადგენდა პოტენციური ტრენერების მომზადება მოხალისეთათვის სწავლების ჩატარების მიმართულებით.
კომპანია Digiway-ის მიერ, 2024 წლის 16-17 აპრილს, ევროკავშირის პროექტის ფარგლებში თურქეთში ჩატარებულ სასწავლო ტრენინგში. სწავლების მიზანს წარმოადგენდა მოხალისე მაშველების გადამზადება ხანძრის, მეწყერის და წყალდიდობის შემთხვევაში.
ევროკავშირის პროგრამის ფარგლებში, იტალიის ქალაქ რომში, 2024 წლის 7-11 აპრილის PPRD East 3 -ის მიერ ორგანიზებულ ექსპერტთა გაცვლის პროგრამაში, რომლის მიზანსაც წარმოადგენდა საუკეთესო გამოცდილებისა და ინფორმაციის გაზიარება სამოქალაქო უსაფრთხოების დაგეგმარების და მოხალისეთა სისტემის დანერგვის შესახებ“.
Loading ...