გურიაში კომპენსაციების გაცემა იწყება – რა თანხას მიიღებენ სტიქიისგან დაზარალებული ოჯახები

დღეს გამართულ სხდომაზე, ოზურგეთის მუნიციპალიტეტის მერმა ავთანდილ თალაკვაძემ განაცხადა, რომ მთავრობა 8 სექტემბრის სტიქიისგან დაზარალებული ოჯახებისთვის კომპენსაციების გადაცემის პროცესს იწყებს:

”პრემიერ მინისტრის გადაწყვეტილებით, ვიწყებთ 8 სექტემბერს სტიქიური მოვლენების შედეგად დაზარალებული ოჯახებისთვის კომპენსაციების გაცემას, მათ, ვისაც საკუთრებაში რეგისტრირებული საცხოვრებელი სახლები სტიქიამ დაუნგრია, შესაბამისი კომპენსაცია გადაეცემა. კერძოდ, ოჯახებს, რომელთაც სტიქიამ საცხოვრებელი დაუნგრია და არა აქვთ საკუთრებაში რეგისტრირებული ალტერნატიული ფართი, კომპენსაცია გადაეცემათ 50 000 ლარის ოდენობით. იმ დაზარალებულ ოჯახებს, რომელთაც საკუთრებაში აქვთ ან სტიქიის მომენტისთვის ჰქონდათ რეგისტრირებული ალტერნატიული საცხოვრებელი ფართი, კომპენსაცია გადაეცემათ 30 000 ლარის ოდენობით. აქვე ხაზგასმით მინდა გითხრათ, რომ დაზარალებულ ოჯახებზე გაცემული კომპენსაცია სოციალურად დაუცველი პირების ერთიან ბაზაში გადამოწმების საფუძველი არ გახდება. ჩვენი მონაცემებით, ამ დროისთვის 152 ოჯახმა უკვე შეძლო სრულყოფილი დოკუმენტაციის წარმოდგენა, რომელიც გადაიგზავნა კომპენსაციის განაცხადთან ერთად, პროცესი რა თქმა უნდა გრძელდება და ჩვენ მზად ვართ დამატებითი კონსულტაციები გავუწიოთ ჩვენს თანამოქალაქეებს, რათა არცერთი ოჯახი არ დარჩეს ყურადღების გარეშე.”– განაცხადა ოზურგეთის მუნიციპალიტეტის მერმა