შპს ”გურია ექსპრესის” გაფიცული თანამშრომლები ხვალ ოზურგეთის ადმინისტრაციული შენობის წინ მასშტაბურ აქციას და ქალაქის ქუჩებში მსვლელობას გეგმავენ.როგორც ”გურიაTV”-ს ერთ-ერთმა გაფიცულმა მშრომელმა ლადო ურუშაძემ განუცხადა, აქციას ოზურგეთელი გაფიცულების მხარდასაჭერად თბილისიდან, ზესტაფონიდან, ჭიათურიდან და სხვა ქალაქებიდან სხვადასხვა დარგის წარმომადგენლები შემოუერთდებიან. აქციაზე ჩამოვა პროფესიული გაერთიანებების კავშირის წარმომადგენლობაც.
”ადგილობრივმა ხელისუფლებამ გვითხრა, რომ გაფიცვის მე-18 დღეს გაიგეს,ჩვენ რომ ქუჩაში ვიდექით და უსამართლობას ვაპროტესტებდით. მერე კი გვითხრეს, რომ მაქსიმალურად დაგვეხმარებოდნენ და ყველაფერი ისე იქნებოდა, როგორც ჩვენ გვინდოდა, მაგრამ დღემდე ლოდინის რეჟიმში ვართ და ახალი არაფერია. მხოლოდ ადმინისტრაციულ შენობაში გვიბარებენ ხოლმე, აქ ადგილზე მოსვლა და სიტუაციის პირადად ნახვა ხელისუფლების არცერთ წევრს არ უცდია.
იმედი გვაქვს, ჩვენი ბრძოლა წარმატებით დასრულდება და სამართლიანობა გაიმარჯვებს.” – აღნიშნა ლადო ურუშაძემ.
როგორც დღეს ცნობილი გახდა, კომპანია ”გურია ექსპრესი” გაფიცულებთან მოლაპარაკებებს აღარ აპირებს და დავას სასამართლოში გააგრძელებს. ბრძოლის ამავე მეთოდზე გადავლენ გაფიცულებიც და სასამართლოს სარჩელით თავადაც მიმართავენ.
შეგახსენებთ, რომ ოზურგეთში ფქვილის მწარმოებელი შპს ”გურია ექსპრესის” თანამშრომლები უკვე 32-ე დღეა გაფიცულები არიან. მშრომლები დაბალ ანაზღაურებას და არასათანადო შრომით პირობებს აპროტესტებენ.
კომენტარები
Loading ...