გია ვოლსკი: ნიკა გვარამია არის უნამუსო ადამიანი

„ნიკა გვარამია არის უნამუსო, ფეიკნიუსების მომგონი ადამიანი“, – ასე უპასუხა პარლამენტის პირველმა ვიცე-სპიკერმა გია ვოლსკიმ „მთავარი არხის“ გენერალური დირექტორის ნიკა გვარამიას განცხადებას თავდასხმასთან დაკავშირებით.

„როგორც თქვენი ტელევიზია მთლიანად, ასევე ნიკა გვარამია არის უნამუსო, ფეიკნიუსების მომგონი ადამიანი. მე არ ვფიქრობ, რომ ამას სერიოზული პასუხი უნდა გაეცეს. ანუ მე ვამბობ, რომ თქვენ ხართ სიმდაბლეზე წამსვლელი ადამიანები, თქვენ ხელმძღვანელთან ერთად. სიმდაბლეზე წასვლა ნიშნავს იმას, რასაც თქვენ ახლა აკეთებთ. ასე რომ მიყურებთ თვალებში და თან იცით, რომ უზნეობას ჩადიხართ“, – ასე უპასუხა გია ვოლსკიმ „მთავარი არხის“ ჟურნალისტს, რომელიც მედიის სხვა წარმომადგენლებთან ერთად დაინტერესდა, რა პასუხი ჰქონდა მას ნიკა გვარამიას განცხადებაზე.

„კითხვა არ არის ეს – აპირებთ თუ არა პასუხისმგებლობის აღებას თავის თავზე, ეს არის უზნეო ადამიანების მიერ მოგონებული და ეს ადამიანი ჩათრეულია ამ უზნეობაში“ ,- განაცხადა გია ვოლსკიმ.

ტელეკომპანია „მთავარი არხის“ გენერალურმა დირექტორმა ნიკა გვარამიამ მისდამი ფიზიკური შეურაცხყოფის ფაქტზე პასუხისმგებლობა პარლამენტის თავმჯდომარის პირველ მოადგილეს გია ვოლსკის დააკისრა. მან აღნიშნა, რომ თავდამსხმელები გია ვოლსკის შტაბის წევრები არიან და მისგან იყვნენ გამოგზავნილი.

„ზუსტად ვიცი, რომ ეს სამი ადამიანი ჩუღურეთიდან არიან, სვანეთისუბნელები და არიან ბატონი [გია] ვოლსკის შტაბის წევრები… და აბსოლუტური რწმენა მაქვს, რომ ეს ხალხი არის გამოგზავნილი ბატონი ვოლსკის მიერ“, – ამბობს ნიკა გვარამია.

ის მომხდარის გამო ხელისუფლების პოლიტიკური პასუხისმგებლობის დაყენებას მოითხოვს, კერძოდ, მისი მოთხოვნაა, გია ვოლსკიმ დატოვოს პარლამენტი.

ტელეკომპანია „მთავარი არხის“ გენერალური დირექტორის და ამავე არხის თანადამფუძნებლის, გიორგი რურუას, ადვოკატის ნიკა გვარამიას ფიზიკური შეურაცხყოფის ფაქტზე გამოძიება დაიწყო სისხლის სამართლის კოდექსის 126-ე (ძალადობის) მუხლის პირველი ნაწილით.

მუხლის ეს ნაწილი მოიცავს ცემას ან სხვაგვარ ძალადობას, რამაც დაზარალებულის ფიზიკური ტკივილი გამოიწვია, მაგრამ არ მოჰყოლია ჯანმრთელობის განზრახ მსუბუქი დაზიანება.

30 იანვარს, საქალაქო სასამართლოში, სადაც იარაღის უკანონო შეძენა-შენახვა-ტარების ბრალდებით დაკავებული გიორგი რურუას სასამართლო პროცესი მიმდინარეობდა, მის ადვოკატს, ნიკა გვარამიას ფიზიკური შეურაცხყოფა მიაყენეს.

ნიკა გვარამია სასამართლო პროცესიდან შესვენებისას დარბაზიდან იყო გამოსული, რა დროსაც, როგორც თავად ამბობს, მისთვის უცნობმა მამაკაცმა სახეში ჩაარტყა.

პოლიციამ ინციდენტის შემდეგ სამი პირი გამოკითხა.

www.radiotavisupleba.ge