გია ვოლსკი – ირაკლი კობახიძემ სტუმარი მიიყვანა პარტიის ლიდერთან – მე თქვენთან სახლში რომ სტუმარი მოვიყვანო და თქვენ იყოთ მთავარი მასპინძელი, ეს იმას არ ნიშნავს, რომ ჩემი როლი დაკნინებულია

2012 წლიდან ბიძინა ივანიშვილი არის პარტიის ლიდერი, ჩამომყალიბებელი, მაგრამ არც ერთხელ თავისი ქმედებით ან სიტყვით არ გამოუვლენია ის, რომ ის ვინმეზე მაღლა დგას – ირაკლი კობახიძემ სახელმწიფოში ჩამოსული სტუმარი მიიყვანა პარტიის დამფუძნებელთან, ლიდერთან – მე თქვენთან სახლში რომ სტუმარი მოვიყვანო და თქვენ იყოთ მთავარი მასპინძელი, ეს იმას არ ნიშნავს, რომ ჩემი როლი რაიმეთი დაკნინებულია, – ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა, რითაც აზერბაიჯანის პრეზიდენტის, ილჰამ ალიევისა და „ქართული ოცნების“ საპატიო თავმჯდომარის, ბიძინა ივანიშვილის შეხვედრის შესახებ შეკითხვას უპასუხა.

მისი თქმით, “კადრებით არ შეიძლება გადაწყვეტილება მიიღო იმის თაობაზე, თუ ვის მეტი გავლენა აქვს”.

“აღებული კადრებით არ შეიძლება გადაწყვეტილება მიიღო იმის თაობაზე, თუ ვის მეტი გავლენა აქვს – სისტემას უნდა იცნობდე. 2012 წლიდან ბიძინა ივანიშვილი არის პარტიის ლიდერი, ჩამომყალიბებელი, მაგრამ არც ერთხელ თავისი ქმედებით ან სიტყვით არ გამოუვლენია ის, რომ ის ვინმეზე მაღლა დგას.

ირაკლი კობახიძემ სახელმწიფოში ჩამოსული სტუმარი მიიყვანა პარტიის დამფუძნებელთან, ლიდერთან. ამ თემასთან დაკავშირებით ინტერპრეტაციას მე ვერ დაგიშლით, მაგრამ ძალიან ცუდი მაგალითია იმისათვის, რათა იმსჯელოთ ურთიერთობებზე, რომელიც პარტიის შიგნით არის ჩამოყალიბებული.

ბიძინა ივანიშვილის პრემიერობის დროს ჩამოყალიბდა საკმაოდ ინტენსიური და ახლო ურთიერთობა აზერბაიჯანის ხელმძღვანელობასთან და არ გაწყვეტილა დღემდე. ასე რომ, მე თქვენთან სახლში სტუმარი მოვიყვანო და თქვენ იყოთ მთავარი მასპინძელი, ეს იმას არ ნიშნავს, რომ ჩემი როლი რაიმეთი დაკნინებულია და ეს თქვენი ინტერპრეტაცია ნამდვილად არ არის სინდისიერი”, – განაცხადა ვოლსკიმ.

კითხვაზე, რა როლი აქვს ბიძინა ივანიშვილს ქვეყნის მართვაში, ვოლსკიმ უპასუხა, რომ “ბიძინა ივანიშვილი, როგორც ამ პარტიის დამფუძნებელი, ამ ხელისუფლების ჩამომყალიბებელი, როგორც ადამიანი, რომელმაც მნიშვნელოვანი წვლილი შეიტანა ქვეყნის გადარჩენის პროცესში, შესაბამისად არის დაფასებული ყველა მათგანის მიერ”.

“მნიშვნელოვანი როლი აქვს, ისევე როგორც ბევრ ჩვენგანს, მაგრამ ფაქტია, რომ ბიძინა ივანიშვილი, როგორც ამ პარტიის დამფუძნებელი, ამ ხელისუფლების ჩამომყალიბებელი, როგორც ადამიანი, რომელმაც მნიშვნელოვანი წვლილი შეიტანა ქვეყნის გადარჩენის პროცესში, შესაბამისად არის დაფასებული ყველა ჩვენგანის მიერ. არცერთი გადაწყვეტილება მის მიერ არასოდეს არ მიღებულა იმ კონსულტაციების გარეშე, რომელიც ჰქონდა მას მათ შორის პოლიტსაბჭოს წევრებთან.

რაც შეეხება პრემიერ-მინისტრს, იგი არის მმართველი, მართავს იმ სისტემით, რომელიც ჩამოყალიბებულია და რომელსაც ბოლო პერიოდში ცვლილება არ განუცდია. ირაკლი კობახიძეს არც ინტელექტი აკლია, არც ცოდნა და არც განწყობა. ბიძინა ივანიშვილს ამ ქვეყანაში პატივისცემაც აქვს, დაფასებაც და ამ ქვეყნის მიმართ მისი თავდადება ყველასთვის არის ცნობილი, თქვენს გარდა. თქვენთვისაც ცნობილია, მაგრამ თქვენ ნერვებს გიშლით”, – აღნიშნა გია ვოლსკიმ.

ცნობისთვის, გუშინ, საქართველოში ოფიციალური ვიზიტით ჩამოსული აზერბაიჯანის პრეზიდენტი ილჰამ ალიევი, ირაკლი კობახიძესთან და მიხეილ ყაველაშვილთან შეხვედრის შემდეგ, “ქართული ოცნების“ საპატიო თავმჯდომარემ ბიძინა ივანიშვილმა მიიღო. ალიევი ივანიშვილს თბილისის ბიზნესცენტრში შეხვდა. გავრცელებული ვიდეო-ჩანაწერიდან ჩანს, რომ ალიევის ბიზნესცენტრში სტუმრობისას იმყოფებოდა პრემიერი ირაკლი კობახიძე. ამასთან, ივანიშვილმა აზერბაიჯანის პრეზიდენტს ეკონომიკისა და მდგრადი განვითარების მინისტრი მარიამ ქვრივიშვილი, საგარეო საქმეთა მინისტრი მაკა ბოჭორიშვილი, მთავრობის ადმინისტრაციის უფროსი ლევან ჟორჟოლიანი და საქართველოს ელჩი აზერბაიჯანში ზურაბ პატარიძე წარუდგინა.