გია ვოლსკი "გირჩის" ხატებით პერფორმანსზე: ეშმაკეულის გარდა ამას ვერავინ გააკეთებს

საპარლამენტო უმრავლესობის ლიდერმა და პირველი ვიცესპიკერობის კანდიდატმა „გირჩის“ ხატებიანი აქცია შეაფასა.

„იმდენად უზნეობაა, არ მინდოდა ამაზე კომენტარის გაკეთება. ხატებით არ შემოიფარგლება მარტო ამ გუნდის უზნეობა. იქ იყო – „ჯოჯოხეთს მოგიწყობთ“, ეშმაკეულის გარდა, ამას ვერც ვერავინ იტყვის და გააკეთებს. უღირსი საქციელია. შეიძლება სულ ათეისტი იყო ან „გირჩის“ ეკლესიასთან იყო ნაზიარები, მაგრამ არსებობს რაღაც ღირსება, საუკეთესო მემკვიდრეობა, ტრადიცია, რომელსაც არ უნდა გადაუარო ფეხით და ეს არ ეხება მხოლოდ „გირჩს“, – განაცხადა გია ვოლსკიმ.

„გირჩის“ პერფორმანსს უგემოვნო უწოდა საპატრიარქომ. დეკანოზ ანდრია ჯაღმაიძის განცხადებით, ეს რწმენასა და ეკლესიას შეუერაცხყოფს.  

დღეს „გირჩის“ წარმომადგენლები ბიძინა ივანიშვილის სახლთან აქცია გამართეს. აქტივისტებს ხელში სანთლები და „ხატები” ეჭირათ, სადაც ბიძინა ივანიშვილი იყო გამოსახული და სიმღერა „ვხედავ მეცვხარეს“ შეასრულეს.

presa.ge