„გთხოვთ, ბატონი ზაზა პროცესზე აღარ დაუშვათ, რადგან მისი მხრიდან პროვოკაციულ მოქმედებებს აქვს ადგილი და ყველაფრის მომთმენი ჩემი ოჯახის წევრები მდგომარეობიდან გამოყავს ‘’, – ამ სიტყვებით მიმართა მოსამართლეს ხორავას ქუჩის საქმეზე ბრალდებულმა, მიხეილ კალანდიამ და მოითხოვა, რომ ზაზა სარალიძე მის სასამართლო პროცესებს აღარ დაესწროს.
„სამწუხაროა, მსგავსი ფაქტი რომ მოხდა. ყველა ადამიანს აქვს ნერვები და ყველაფერს აქვს საზღვარი. მესმის, რომ ზაზა სარალიძე დაზარალებულის უფლებამონაცვლეა, მაგრამ ჩემი და ჩემი ოჯახის არასახარბიელო ფსიქოლოგიური მდგომარეობიდან გამომდინარე, გთხოვთ, ბატონი ზაზა პროცესზე აღარ დაუშვათ, რადგან მისი მხრიდან პროვოკაციულ მოქმედებებს აქვს ადგილი და ყველაფრის მომთმენი ჩემი ოჯახის წევრები მდგომარეობიდან გამოყავს.
გთხოვთ, ბატონ ზაზა სარალიძეს სხდომაზე დასწრების უფლება აუკრძალოთ, ადვოკატი დაესწროს და გადასცეს მას რა ხდება სხდომაზე თუ აინტერესებს, მაგრამ ეჭვი მეპარება, რომ აინტერესებდეს”, – განაცხადა მიხეილ კალანდიამ.
მოსამართლე ნიკოლოზ მარსაგიშვილის განცხადებით, პირი სხდომათა დარბაზში რომ არ დაიშვას, ის გაფრთხილებული ან გაძევებული უნდა იყოს.
“ეს საკითხი ახლა არ გადაწყდება, ვინ დაესწრება სხდომას”, – განაცხადა მარსაგიშვილმა.
ცნობისთვის, თბილისის საქალაქო სასამართლოში ხორავას ქუჩის საქმეზე ბრალდებული მიხეილ კალანდიას სასამართლო პროცესი მიმდინარეობს, სადაც საქმის ერთ-ერთი ფიგურანტი მირზა სუბელიანის ვაჟი იკითხება.
პროცესი ხმაურის ფონზე მიმდინარეობს დაპირისპირება მიხეილ კალანდიასა და ზაზა სარალიძეს შორის მოხდა. კერძოდ, მოწმის დაკითხვისას, პროტესტის ნიშნად, დარბაზი ზაზა სარალიძემ დატოვა, რასაც მიხეილ კალანდიას მამის, თენგიზ კალანდიასა და ძმის, ლუკა კალანდიას მხრიდან უკმაყოფილება მოჰყვა. ისინი სასამართლო დარბაზიდან გამოვიდნენ და სარალიძეს გაეკიდნენ.
წყარო: 2020news.ge
Loading ...
