გერმანიაში, შტუტგარტის კლინიკაში მოღვაწე წარმოშობით ოზურგეთელი ექიმის, ნინო ნაცვალაძის რჩევები და რეკომენდაციები, გერმანულ გამოცდილებაზე დაყრდნობით

“მთავარია, ამ პრობლემის მოგვარებაში მეტი გამჭვირვალობა და მოსახლეობის სწორად ინფორმირება. ადამიანებმა უნდა იცოდნენ რა ხდება, როგორ ხდება და რატომ?!” – გერმანიაში, შტუტგარტის კლინიკაში მოღვაწე წარმოშობით ოზურგეთელი ექიმი, ნინო ნაცვალაძე ფეისბუქის საკუთარ გვერდზე პოსტს ავრცელებს და გერმანულ გამოცდილებაზე დაყრდნობით თავის რჩევებსა და რეკომენდაციებს გვიზიარებს. 

– ამ დღეებში სულ მესმის , რომ საქართველოში რეგულაციების თანდათანობით მოხსნას ითხოვენ და პარალელს ავლებენ ევროპულ ქვეყნებთან. თუ იქ კარანტინი შემსუბუქდა , ჩვენთანაც იგივე რატომ არ ხდებაო?! ამასთან დაკავშირებით მინდა ჩემი აზრი გამოვხატო….მთავარია, ამ პრობლემის მოგვარებაში მეტი გამჭვირვალობა და მოსახლეობის სწორად ინფორმირება.
ადამიანებმა უნდა იცოდნენ რა ხდება, როგორ ხდება და რატომ?!

სხვაგან არ ვიცი, მაგრამ გერმანიაში ეს ასეა ….
პოლიტიკოსები , რათქმა უნდა, სისტემატურად იღებენ ეპიდემიოლოგებისგან, სანდო სტატისტიკაზე დამყარებულ, ინფორმაციას (ცთომილების და ბნელი ციფრების გათვალისწინებით) : სად ვიმყოფებით ინფექციის გავრცელების მრუდზე. აღმავალი მრუდის ექსპოდენციალური ზრდის ფაზაში ვართ თუ ხაზობრივი (წრფივი) ზრდის? ეს ნიშნავს , რომ გვიხსნიან, ინფექციის რეპროდუქციის / გადაცემის ინდექსი 1:3-ია (ანუ ერთი ადამიანი 3-ს აინფიცირებს) თუ ერთზე ნაკლებია. ამის მიხედვით მოქალაქეები ხვდებიან პლატოზე ვართ, ტალღის პიკზე თუ ” ნაპირზე”. ეს კი ეფუძნება ტესტირების შედეგებს, ბნელ ციფრებზე წარმოდგენას და მეცნიერულ გაანგარიშებას. ამის შემდეგ, როცა იცი, რა გჭირს… დაინფიცირებულებში გამოყოფენ მძიმე და საშუალო კატეგორიას… და ადარებენ სამედიცინო რესურსების რაოდენობას (კარგია თუ კოეფიციენტი 1:1-ია და იდეალური, თუ უფრო ნაკლებია). უკვე იცი, რესურსი გყოფნის, დახმარება გჭირდება თუ მოგრჩა. როცა ვიცით უკვე საბანი სადამდე გვწვდება,იწყება რეგულაციებზე საუბარი, შემსუბუქება ან გამკაცრება. ამავე დროს გარკვეული ინტერვალებით- 10 დღე იქნება თუ 2 კვირა, აფასებენ გადადგმული ნაბიჯების სისწორეს და გამოაქვთ სათანადო დასკვნები. როცა ასეთი ანალიზის შედეგი იდება და ცნობილი ხდება მოსახლეობისთვის, თვითნებობას ადგილი ნაკლებად აქვს.

ასეთ ორგანიზებაში და სისტემურად სწორად გათვლილ ნაბიჯებში მივბაძოთ წარმატებულ ქვეყნებს და არა იმაში, ვინ როდის ხსნის და აიოლებს რეგულაციას, რომელიც თითოეული ქვეყნისთვის ინდივიდუალურია.

და კიდევ ერთი, ჩემი აზრით, ძალიან მნიშვნელოვანი!…….გერმანიამ, უკვე მოითხოვა განსაკუთრებული მზადყოფნა სეზონური გრიპისთვის. მზადყოფნაში იგულისხმება, სექტებერში, სეზონური გრიპის ვაქცინის, არამცთუ საკმარისი, არამედ სარეზერვო რაოდენობით უზრულველყოფა. ეს აუცილებელია, რომ შემოდგომაზე, როცა კოვიდ პაციენტებს დაემატება სეზონური გრიპით დაინფიცირებულები, არ მოხდეს ორმაგი გადატვირთვა კლინიკების და სამედიცინო რესურსების.

იქნებ ჩვენც გავითვალისწინოთ და არ დავაგვიანოთ!