გახარია: გუნდში არანაირი დაძაბულობა და დაპირისპირება არ არის

პრემიერმინისტრ გიორგი გახარიას განცხადებით, გუნდში არანაირი დაძაბულობა და დაპირისპირება არ არის. 

ამის შესახებ პრემიერმინისტრმა ჟურნალისტებს ბათუმში განუცხადა, სადაც მთავარ სტადიონთან არასამთავრობო ორგანიზაცია „ალტერნატივასა” და „ერთიანი ნაციონალური მოძრაობის“ წევრები პრემიერს შეძახილებით: „სამარცხვინო გახარია“ დახვდნენ.

პროტესტის მონაწილეებს პრემიერთან მიახლოების საშუალება სამართალდამცველებმა არ მისცეს. გახარიამ ბათუმის მთავარი სტადიონის მშენებლობა დაათვალიერა.

ჟურნალისტების კითხვაზე, რატომ არ ესწრებოდა თბილისის მერი კახა კალაძე საპარლამენტო უმრავლესობის სხდომას, გახარიამ უპასუხა, რომ მერს ალბათ თავისი მნიშვნელოვანი საქმე ჰქონდა.

„კახი კალაძე არის ჩვენი გუნდის ერთ-ერთი ყველაზე ღირსეული წარმომადგენელი. თბილისის საუკეთესო, წარმატებული მერი. ძალზედ მნიშვნელოვან პროექტებს ახორციელებს ქალაქში, არის მაღალრეიტინგული პოლიტიკოსი ქვეყანაში, გუნდში არანაირი დაძაბულობა და დაპირისპირება არ არის. რაც უფრო ძლიერი მსგავსი პოლიტიკოს პოლიტიკოსი გვეყოლება გუნდში, მით უფრო წარმატებული იქნება „ქართული ოცნება. უმრავლესობის სხდომას არ ესწრებოდა იმიტომ, რომ ალბათ თავისი მნიშვნელოვანი საქმე ჰქონდა“, – განაცხადა გიორგი გახარიამ. 

პრემიერს ექიმ ვაჟა გაფრინდაშვილის გათავისუფლების საკითხზეც ჰკითხეს.  

„ამ მძიმე პრობლემასთან მიმართებაში მთავრობა, შესაბამისი უწყებები სრულ კოორდინაციაში არიან საერთაშორისო ორგანიზაციებთან, ერთობლივად ვმოქმედებთ და იმედი მაქვს უახლოეს პერიოდში ყველას ერთად შეგვეძლება, ამ მძიმე ისტორიის დასრულება ერთმანეთს ვაცნობოთ“, – განუცხადა ჟურნალისტებმა პრემიერმინისტრმა. 

imedinews.ge