გაძვირდება თუ არა წინასააღდგომოდ კვერცხი

კვერცხის მწარმოებელი კომპანია “კუმისის” დამფუძნებლის ზურაბ უჩუმბეგაშვილის თქმით, წინასააღდგომო პერიოდში კვერცხის გაძვირება არ იგეგმება.

როგორც ზურაბ უჩუმბეგაშვილმა განმარტა, ფასი უცვლელი რჩება არა მარტო “კუმისის”, არამედ სხვა მსხვილი მწარმოებლების პროდუქციაზეც.

“ქართული კომპანიები, რომლებიც დღეს ბაზარზე ვართ წარმოდგენილნი, ვგულისხმობ მათ, ვინც ამინდს ქმნის ამ სფეროში, ფასის ცვლილებას არ ვგეგმავთ, რადგან ეს არასწორი იქნებოდა. წლის დასაწყისში კვერცხის ფასი 6%-ით ისედაც გაიზარდა და მას შემდეგ ღირებულება უცვლელი დარჩა. დღეს, საშუალოდ 10 კვერცხიანი შეფუთვის ფასი 4,5 ლარიდან 5,5 ლარამდე მერყეობს (ხარისხისა და ზომის მიხედვით)”,- აღნიშნავს ზურაბ უჩუმბეგაშვილი.

მისივე თქმით, კვერცხზე მოთხოვნა წელს, შარშანდელთან შედარებით, გაზრდილია, ამ ნაწილში კი მნიშვნელოვანი ფაქტორი აღმოჩნდა მიგრანტების ეფექტი.

“წელს დაუპატიჟებელი სტუმრები გვყავს მეზობელი ქვეყნიდან. ისინიც მართლმადიდებელი ქრისტიანები არიან, ამიტომ ჩვენსავით აღნიშნავენ აღდგომას. ცხადია, გასულ წელთან შედარებით წელს ეს ფაქტორი დამატებითია და მოთხოვნა იმაზე მეტადაა გაზრდილი, ვიდრე წინა წლებში. მიუხედავად ამისა, სრული პასუხისმგებლობით ვაცხადებ, რომ მწარმოებლებმა ვიზრუნეთ მარაგებზე და პროდუქტის დეფიციტი ნამდვილად არ შეიქმნება”,- აღნიშნავს უჩუმბეგაშვილი.

საქსტატის თანახმად, 2023 წლის მარტში, წინა თვესთან შედარებით, საქართველოში 0.2%-იანი დეფლაცია, ანუ სამომხმარებლო ფასების საერთო დონის კლება დაფიქსირდა, ხოლო წლიური ინფლაციის მაჩვენებელმა 5.3% შეადგინა. ინფლაციის ფორმირებაზე მთავარი გავლენა კვლავ სურსათის ფასების მატებამ იქონია – სურსათი წლიურ ჭრილში 14%-ით გაძვირდა. უშუალოდ კვერცხის ღირებულება წლიურ ჭრილში 13.6%-ითაა გაზრდილი.

წყარო-“ბიზნეს ფორმულა“