“გასული 4 წლის განმავლობაში, უცხოელებზე 60 ათასზე მეტი ბინა გაიყიდა”- ირაკლი კობახიძე

რაც შეეხება ბინადრობის ნებართვას, კობახიძის თქმით, ბინის შეძენის შემთხვევაში უცხოელი იღებს მხოლოდ მოკლევადიან ბინადრობის ნებართვას 6-დან 12 თვემდე ვადით.

„ცალსახად შეიძლება ითქვას, რომ არავითარი არაბული, რუსული თუ გერმანული ქალაქები არ შენდება. რეალურად შენდება ორი ულამაზესი უბანი, თბილისისა და ბათუმის მიმდებარედ. ეს იქნება ამ პროექტის საბოლოო შედეგი.

რაც შეეხება მიგრაციულ ეფექტს. გასული 4 წლის განმავლობაში, უცხოელებზე 60 ათასზე მეტი ბინა გაიყიდა. კიდევ ერთხელ შემიძლია განვაცხადო, რომ ამას დემოგრაფიაზე არავითარი არსებითი გავლენა არ მოუხდენია. ამას განაპირობებს ის საიმიგრაციო პოლიტიკა, რომელიც ჩვენს ქვეყანას აქვს. აქაც სპეკულაციები მოვისმინეთ იმასთან დაკავშირებით, რომ როდესაც ბინას ყიდულობს უცხოელი, მას ავტომატურად ენიჭება ბინადრობის უფლება.

ჩვენი კანონმდებლობით, ბინის შესყიდვაზე 100 ათას დოლარზეა მიბმული ბინადრობის ნებართვის გაცემა. ამ შემთხვევაში, ეს არ არის ავტომატური და შესაბამისს პროცედურას გადის თითოეული შემთხვევა, მათ შორის უსაფრთხოების კონტროლსაც. მეორე – ისინი არ აკონკრეტებენ, რომ ეს არის მოკლევადიანი ბინადრობის ნებართვა. ისე წარმოაჩენენ საზოგადოების წინაშე, რომ თითქოს, როგორც კი იყიდი 100 ათას დოლარიან ბინას, მუდმივად შეგიძლია იცხოვრო საქართველოში. ეს არის მოკლევადიანი ბინადრობის უფლება 6 თვიდან 12 თვემდე. არავითარ გარანტიას არ გაძლევს ბინის შესყიდვა იმ კუთხით, რომ შენ საცხოვრებლად საქართველოში დარჩე.

ამ პროექტის შემთხვევაში კიდევ ერთხელ მინდა დავაზუსტო, რომ არავითარი სპეციალური პრივილეგიები უცხოელ მყიდველებს არ ენიჭებათ გარდა იმისა, რაც ზოგადად, კანონმდებლობით არის გათვალისწინებული.

როცა იცი, რომ არავითარი არაბული ქალაქები ქვეყანაში არ შენდება, უბრალოდ არ უნდა იკადრო სპეკულაცია. არის რაღაცები, როცა „ნაცი“, „ლელო“, „ალტ ინფო“ რომ ხარ მაშინაც არ უნდა იკადრო სპეკულაციები, თუმცა ვხედავთ, როგორია ამ ადამიანების მორალი“,- განაცხადა კობახიძემ.