გიორგი მთაწმინდელის სახელობის საეკლესიო გალობის უმაღლესი სასწავლებლის ადმინისტრაციის უფროსი, საქველმოქმედო ფონდის „ქართული გალობა“ აღმასრულებელი დირექტორი – ეს ნანა გოთუას ოფიციალური ტიტულებია, თუმცა მათ უკან დგას ადამიანი, რომლის ჩუმად ნაკეთებ სიკეთეს ძალიან ხშირად ვხდებით.
ახლა, ამ პანდემიის დროს, მის მიერ, კამერების მიღმა გაწეულმა ქველმოქმედებამ, მხოლოდ ოზურგეთში ასობით ოჯახი შიმშილისგან იხსნა.
თავად ამ თემაზე არასდროს საუბრობს და ალბათ არც ამის გახმაურება მოეწონება, თუმცა ოზურგეთში, სადაც ნანა გოთუა დაიბადა და გაიზარდა, ფიქრობენ, რომ სათქმელი უნდა ითქვას. სათქმელი კი ასეთია: სიკეთე გადამდებია და სწორედ ასე გადაედო ერთიდან მეორეს, მეორედან მესამეს და დღეს, ძალიან ბევრი ადამიანი ოზურგეთში სოციალურად დაუცველებისთვის, უსამსახუროდ დარჩენილებისთვის აგროვებს საკვებს, ტანსაცმელს და სოფელსა თუ ქალაქში არიგებს.
ამ ყველაფერში კი ერთ-ერთი პირველი სწორედ ნანა გოთუა იყო, რომელმაც მშობლიურ ოზურგეთში, ჯერ კიდევ მარტში, დახმარების ასობით პაკეტი გამოაგზავნა და დღესაც იმავეს აგრძელებს – ეხმარება იმ ადამიანებს, რომლებსაც ყველაზე მეტად უჭირთ და ამას, როგორც აღვნიშნეთ, ჩუმად აკეთებს. თუმცა ოზურგეთი პატარაა, აქ არაფერი იმალება და ყველამ ყველაფერი იცის. იციან ისიც, რომ ნანა გოთუა ხშირად ეხმარება გურია TV – ს რესპოდენტებს, ადამიანებს, რომლებიც საკუთარ გაჭირვებას ჩვენ გვიყვებიან, ჩვენ – თქვენ და ასე, ერთად კეთდება საქმე. საქმე, რომელსაც სიკეთე ჰქვია და სწორედ ამიტომ მადლობას გიხდით ყველას, ვინც გვიყურებს, კითხულობს, გვეხმიანება და ფიქრობს ადამიანებზე, რაც ყველაზე ძვირფასი რამაა ამ ქვეყანაზე!
Loading ...