ბესიკ მელუას სარჩელი საოლქო კომისიამ არ დააკმაყოფილა, ”საერთაშორისო გამჭვირვალობა საქართველოს” სარჩელი კი დაკმაყოფილებულ იქნა

ოზურგეთის მე-60 საოლქო-საარჩევნო კომისიაში არჩევნების დღეს შემოსული საჩივრების განხილვა გაიმართა. კენჭისყრის დღეს ოლქში სულ 5 საჩივარი შემოვიდა და თითოეული მათგანი პროცედურული ხასიათის დარღვევებს ეხებოდა. კომისიამ ყველა საჩივარი განიხილა და ხმათა უმრავლესობით 2 მათგანი დააკმაყოფილა.

ერთ-ერთი საჩივრის ავტორი ”ქართული ოცნების” წევრი და დეპუტატი ბესიკ მელუა იყო, რომელიც აცხადებდა, რომ ბახვის საარჩევნო უბანზე კომისიის წევრი ერთ-ერთი პარტიის სასარგებლოდ აგიტაციას ატარებდა.  მელუა დამრღვევი პირის საქმიანობის გამოკვლევას და შესაბამისი ზომების მიღებას ითხოვდა. როგორც ოლქის იურისტმა ენვერ ბარამიძემ განაცხადა, ოლქმა შესაბამისი მოკვლევა ჩაატარა, რომლის ფარგლებშიც აღნიშნული უბნის თავმჯდომარემ და მდივანმა ახსნა -განმარტებაში უარყვეს მელუას განცხადება და აღნიშნეს, რომ მსგავსი ფაქტი უბანზე არ მომხდარა. შესაბამისად, კომისიამ აღნიშნული საჩივრის დაკმაყოფილებას მხარი არ დაუჭირა.

საოლქო კომისიამ დააკმაყოფილა ”საერთაშორისო გამჭვირვალობა საქართველოს” დამკვირვებლის ვიქტორ ქვიტატიანის საჩივარი, სადაც დამკვირებელი ამბობს, რომ 25-ე უბნიდან გადასატან ყუთთან ერთად წაღებული იქნა  30 ბიულეტენი, ოცი ამომრჩევლიდან ხმა მისცა 18-მა. თუმცა დარჩენილი 12 ბიულეტენის ნაცვლად უკან საუბნო კომისიაში მხოლოდ 10 ბიულეტენი დაბრუნდა. კომისიამ აღნიშნულ საქმეზე დისციპლინური დარღვევა და საოლქო კომისიის რეგლამენტის უხეში დარღვევა დაადგინა და შესაბამისად, ვიქტორ ქვიტატიანის საჩივარი ხმათა უმრავლესობით დააკმაყოფილა. ხსენებული კომისიის წევრების მიმართ კი დისციპლინური პასუხისმგებლობის ზომა – გაფრთხილება გამოიყენა.