ბიზნესმენ ბენ ანორის ადვოკატის, ზურა თოდუას განცხადებით, ჟურნალისტი ელისო კილაძის დაკავება პროკურატურისთვის მათ მიერ წარდგენილი ფარული ჩანაწერების საფუძველზე მოხდა.
“ტვ პირველისთვის”მიცემულ ინტერვიუში ადვოკატი ამბობს, რომ “ელისო კილაძე გივი ჯიბლაძესთან ერთად ძალიან დაახლოებულია ქოლ-ცენტრების მამამთავრებთან საქართველოში და არა მარტო საქართველოში, არამედ უკრაინაშიც” და მისი “ჩიტები”, ანუ ინფორმატორები ყოფილი გენ-პროკურორი ოთარ ფარცხალაძე და სუს-ის ყოფილი უფროსი გრიგოლ ლილუაშვილი იყვნენ.
“იმ ჩანაწერში, რომელიც ჩვენ გავავრცელეთ და პროკურატურას დავუდეთ, აშკარად არის ინფორმაცია იმის თაობაზე, რომ პატივცემული ელისო კილაძე გივი ჯიბლაძესთან ერთად ძალიან დაახლოებულია ქოლ-ცენტრების მამამთავრებთან საქართველოში და არა მარტო საქართველოში, არამედ უკრაინაშიც.
მთავარი მისი ჩიტი, რომელიც დაკავებულია, ეს იყო ლილუაშვილი დიდი ალბათობით და ფარცხალაძე, ერთად იყვნენ ამ ჯგუფში. ჩემს ხელთ არსებული ვარაუდების დონეზე გეუბნებით, მაგრამ დიდი ალბათობით ეს არის ის ჩიტი, რომლის მეშვეობითაც მას ყველანაირ ინფორმაციაზე მიუწვდებოდა ხელი.
ასევე ქალბატონმა ელისომ გამივრცელა ინფორმაცია, რომ თითქოს დამონტაჟებული ეს ჩანაწერი, თითქოს ყალბია და ა.შ. გუშინ დილის 11-ის ნახევარზე სამხარაულის ექსპერტიზის ბიურომ გადმომცცა დასკვნა, რომლითაც უტყუარად დასტურდება, რომ ეს ჩანაწერი არის ავთენტური, არ არის მასზე მონტაჟის კვალი და ა.შ.
მივუტანე გუშინ გენერალურ პროკურატურას, ახლა მაინც გააკეთეთ რეაგირება მეთქი და სავარაუდოდ, ამის საფუძველზე არის ეს რეაგირება გაკეთებული,” — განაცხადა ზურა თოდუა ტვ პირველთან საუბრისას.
შეგახსენებთ, ორგანიზებული ჯგუფის მიერ ჩადენილი თაღლითობის და ფულის გათეთრების საქმეზე სისხლის სამართლებრივი დევნა დაიწყო 10 პირის მიმართ, მათ შორის ბრალდება დაუსწრებლად წარედგინებათ მიმალვაში მყოფ საქართველოს ყოფილ გენერალურ პროკურორს ოთარ ფარცხალაძეს და მისი დანაშაულებრივი ჯგუფის წევრებს: დავით მიქაძეს, ირაკლი სეხნიაშვილს და მიხეილ ჩოხელს. ამავე საქმეზეა დაკავებული “ქრონიკა +”-ის დამფუძნებელი ელისო კილაძეც.
პროკურატურის განცხადებით, ბრალდება ასევე წარედგინა ბენ ანორს, რომელმაც “ქმედითად ითანამშრომლა გამოძიებასთან და არა მხოლოდ აღიარა ჩადენილი დანაშაული, არამედ არსებითად შეუწყო ხელი ტრანსნაციონალური დანაშაულის გახსნას”.
Loading ...