ბასილაშვილი დოჰას ტურნირის მეოთხედფინალშია და იქ როჯერ ფედერერს ელოდებ

ქართველმა ჩოგბურთელმა ნიკოლოზ ბასილაშვილმა დოჰას ATP250 კატეგორიის ტურნირზე მეორე წრის ბარიერიც გადალახა და მეოთხედფინალში გავიდა. ამჯერად, მან ძალიან იოლად დაამარცხა ტუნისელი მალიკ ჟაზირი – 6:2, 6:2. ამისთვის ნიკას მხოლოდ საათი და 17 წუთი დასჭირდა.

ბასილაშვილის უპირატესობა პირველი სეტის სტარტიდანვე გამოიკვეთა და მალე მან ორმაგი ბრეიკით 5:1 წაიყვანა ანგარიში. მართალია, ჟაზირიმ ერთი უკუბრეიკი შეასრულა, მაგრამ იქვე ნიკამ სეტში მესამე ბრეიკიც აიღო და პარტიებში დაწინაურდა.

მეორე სეტიც ზუსტად იგივე სცენარით განვითარდა – ისევ 5:1 წინ გასვლა, ისევ ჟაზირის უკუბრეიკი და ბასილაშვილის ბრეიკით დასრულებული მატჩი.

ქართველმა შესანიშნავად ითამაშა პირველ მოწოდებაზე – მხოლოდ ხუთი ქულა დათმო, 15 ბრეიკ-პოინტი გამოიმუშავა და ექვსი შანსი გამოიყენა.

მეოთხედფინალში ბასილაშვილის მეტოქე შვეიცარიელი როჯერ ფედერერისა და ბრიტანელი დანიელ ევანსის მატჩში გაირკვევა.