შინაგან საქმეთა სამინისტროს ცენტრალური კრიმინალური პოლიციის დეპარტამენტის თანამშრომლებმა, სხვადასხვა დროს ჩატარებული ოპერატიული ღონისძიებებისა და საგამოძიებო მოქმედებების შედეგად, ნარკოდანაშაულის ბრალდებით ოთხი პირი, მათ შორის რუსეთის ფედერაციის მოქალაქე დააკავეს.
ინფორმაციას შინაგან საქმეთა სამინისტრო ავრცელებს. უწყების ცნობით, დანაშაულები 12-დან 20 წლამდე ან უვადო თავისუფლების აღკვეთას ითვალისწინებს.
როგორც განცხადებაშია აღნიშნული, განსაკუთრებით დიდი ოდენობით ნარკოტიკული საშუალების და ფსიქოტროპული ნივთიერების უკანონო შეძენა-შენახვის, რეალიზაციის ხელშეწყობისა და ნარკოტიკული საშუალების შემცველი მცენარის უკანონო დათესვა-მოყვანა-კულტივირების ბრალდებით დაკავებული არიან: 1999 წელს დაბადებული რუსეთის ფედერაციის მოქალაქე ვ.ი. (ბათუმში), 1975 წელს დაბადებული გ.ც. და 1994 წელს დაბადებული გ.რ. (თბილისში), ხოლო უცხო ქვეყნის კიდევ ერთი მოქალაქე, 1993 წელს დაბადებული ი.ა. – ნარკოტიკული საშუალებების რეალიზაციის ხელშეწყობის საქმეზე.
პოლიციამ ბათუმში დაკავებულის, ვ.ი.-ს საცხოვრებელ სახლში და პირად ჩანთაში სარეალიზაციოდ გამზადებული 1347 გრამი გამომშრალი „მარიხუანა“ ამოიღო.
თბილისში ჩატარებული ჩხრეკებისას კი სამართალდამცველებმა ნივთმტკიცებად ამოიღეს 250 გრამზე მეტი „კოკაინი“, „მეთადონი“, ფსიქოტროპული ნივთიერებები, 15 კილოგრამი გამომშრალი „მარიხუანა“ და 32 ძირი „მცენარე კანაფი“.
Loading ...