ახმეტის მერია აღარ გაყიდის იმ შენობას, სადაც პანკისის სათემო რადიოა განთავსებული. საკითხი მუნიციპალიტეტის საკრებულოს დღევანდელ სხდომაზე მერის თანამშრომელმა თინათინ კუდიანიშვილმა უკან გაიწვია და შენობა ისე დატოვა რომ განმარტება არ გაუკეთებია.
სხდომას დაესწრო “რადიო ვეის” დამფუძნებელი და ჟურნალისტი გელა მთივლიშვილი. მისი განცხადებით, ის, რაც ხდება მათ წინააღმდეგ, მიზნად ისახავს რადიოს ხეობიდან გაძევებას.
“ეს არის სახელმწიფო უსაფრთხოების სამსახურის დავალება. ამის გადაწყვეტაში და შესრულებაში მათ ეხმარებიან ადგილობრივი ხელისუფლება და საკრებულოს წევრების ნაწილი. ამიტომაც შემოიტანეს საკითხი დაჩქარებული წესით განხილვაზე. გუშინ გავრცელდა განცხადება, დღეს გამოეხმაურა მედიის ადვოკატირების კოალიცია, რამდენიმე საერთაშორისო ორგანიზაციასთნ გუშინვე გვქონდა კოორდინაცია, საკითხი უკან გაიწვიეს. იმის გამო, რომ წინასაარჩევნოდ არ აღმოჩნდნენ უხერხულ ვითარებაში”, – განაცხადა გელა მთივლიშვილმა.
მან საკრებულოს თავმჯდომარეს შეკითხვითაც მიმართა, საერთოდ რატომ დადგა იმ შენობის გაყიდვის აუცილებლობა, სადაც რადიოს ოფისია განთავსებული. თამარ ყეინიშვილმა მთივლიშვილს განუმარტა, რომ აღნიშნული ფართის გაყიდვა გადაწყვეტილი არ არის და საკითხზე ჯერ მუნიციპალიტეტმა უნდა იმსჯელოს.
სხდომის დასრულების შემდეგ გელა მთივლიშვილსა და პანკისში მცხოვრებ საკრებულოს დეპუტატებს შორის მცირე სიტყვიერი შელაპარაკება მოხდა. დეპუტატები ჟურნალისტს მოუწოდებდნენ პროვოკაციული განცხადებებისგან თავი შეიკავოს და შენობის გაყიდვის საკითხი, ჟურნალისტური საქმიანობის ხელის შეშლას არ დაუკავშიროს.
მათი თქმით,ფონდი როდისკოტი აპირებს ფართის ყიდვას და ხეობაში მცხოვრები ბავშვვებისთვის უფასო განათლების მიცემას, რის გამოც ისინი შენობის გაყიდვას მხარს დაუჭერენ. აღსანიშნავია, რომ ეს ფონდი იმავე შენობაში, სადაც რადიოა განთავსებული ახლაც მუშაობს.
პანკისის სათემო რადიოს ირგვლივ პრობლემები მიმდინარე წლის აგვისტოს ბოლოდან დაიწყო. სოფელ დუისში, რადიოს წინააღმდეგ პირველი საპროტესტო აქცია 29 აგვისტოს გაიმართა, მეორე კი – 5 სექტემბერს.
აქციის მონაწილეები აცხადებდნენ, რომ რადიო და მისი ხელმძღვანელი გელა მთივლიშვილი ხეობაში მიმდინარე მოვლენებს პროვოკაციულად აშუქებს, რაც მათთვის მიუღებელია. ამასთან, პირველ აქციაზე თუ რადიოს დარბევით იმუქრებოდნენ, მეორე აქციაზე თქვეს, რომ მათი მოთხოვნაა ხეობიდან წავიდეს ჟურნალისტი გელა მთივლიშვილის და რომ რადიოსთან არანაირი პრობლემა არ აქვთ.
ჟურნალისტ გელა მთივლიშვილის განცხადებით, ჯერ რადიოს წინააღმდეგ გამართული აქციები და შემდეგ შენობის შესაძლო გაყიდვის მიზანია მედიასაშუალების დახურვა, რაც მათ საქმიანობასა და მომზადებულ მასალებს უკავშირდება.
კოალიციის “მედიის ადვოკატირებისათვის” წევრი ორგანიზაციები პანკისის სათემო რადიოს საკითხზე დაუყოვნებლივ რეაგირებას მოითხოვენ შსს-სგან. გამოძიების დაწყების მომხრეა სახალხო დამცველიც.
საქართველოს კანონმდებლობით, ჟურნალისტურ საქმიანობაში ხელშეშლა სისხლის სამართლის კოდექსით ისჯება. ხოლო ჟურნალისტური საქმიანობის ხელშეშლა მუქარით, ისჯება ჯარიმით ან თავისუფლების აღკვეთით ვადით ორ წლამდე.
www.radiotavisupleba.ge