სურსათის ეროვნული სააგენტო საზოგადოებრივი კვების ობიექტებს აღჭურვილობა-ინვენტარის ზედაპირების რეცხვა-დეზინფიცირების სიხშირის გაზრდისკენ მოუწოდებს. სააგენტო საჯარო სივრცეში განთავსებულ ობიექტებს, სადაც მომხმარებელთა ნაკადი მაღალია, შესაბამისი ჰიგიენური ნორმების დაცვას და სადეზინფექციო სამუშაოების ინტენსიურად ჩატარებას სთხოვს:
რეკომენდაციების სრული ნუსხა კი ასეთია:
- გაზარდეთ ობიექტში ყველა სახის ინვენტარის, მოწყობილობებისა და აღჭურვილობის რეცხვა-დეზინფექციის სიხშირე;
- ობიექტის შესასვლელსა და გამოსასვლელთან განათავსეთ სპეციალური სადეზინფექციო ხსნარიანი მოწყობილობა (რეკომენდებულია სადეზინფექციო ხსნარის სპირტშემცველობა შეადგენდეს არანაკლებ 60 პროცენტს);
- სადეზინფექციო ხსნარიან მოწყობილობასთან განათავსეთ ხელების დეზინფექციის ინსტრუქცია;
- ხელსაბანთან განათავსეთ ხელის დაბანის ინსტრუქცია;
- გამოყენებული ერთჯერადი პარკების, ხელსახოცების, პირბადეების, ხელთათმანების ჩასაყრელად განათავსეთ ნაგვის ურნები, მექანიკური (ფეხით) ასახდელი თავსახურებით;
- ნაგვის ურნების შიგთავსი მოათავსეთ პლასტიკის პარკებში და თავი მჭიდროდ მოუკარით, შემდეგ მეორე პარკში, რომელსაც თავს ასევე მჭიდროდ მოუკრავთ;
- ნაგვის ურნები დაცალეთ სათანადო სიხშირითა და პირობების დაცვით;
- ხშირად დაამუშავეთ კარის სახელურები სადეზინფექციო ხსნარებით;
- შესაძლებლობის მიხედვით გამოიყენეთ სადეზინფექციო და სარეცხი საშუალებებისათვის დაშვებული მაქსიმალური კონცენტრაცია.
11 მარტის დილის მონაცემებით, საქართველოში ახალი სახეობის კორონავირუსით დაავადებულია 23 ადამიანი.
კომენტარები
Loading ...
