შუახევში, სოფელ დაბაძველში, დათვი ორ ქალსა და ერთ მცირეწლოვან ბავშვს თავს დაესხა. დაშავდა 6 წლის ბავშვი, რომელსაც რამდენიმე ნაკერი დაადეს. ამის შესახებ ინფორმაციას “ბათუმელები” ავრცელებს.
74 წლის ვერიკო ზოიძე შვილიშვილთან და რძალთან ერთად ჭალაში იმყოფებოდა, რა დროსაც დათვის ბელებს გადაეყარნენ, შემდეგ კი მათ დედა დათვი დაესხა თავს.
„გზაზე ორი ქალი ვიყავით და ერთი ბავშვი, რომელიც ხელში მყავდა, მაგრამ მაინც ჩამოჰკრა ტორი და მეც გამათრია ბავშვთან ერთად.
დამარტყა ტორი და დამითრია ბავშვთან ერთად. მაინც გამოჰკრა ბავშვს ტორი და ყურთან მიაყენა დაზიანებები.
მისი თქმით, წელს ძალიან ბევრი დათვია სოფელში და მის შემოგარენში. დათვები საცხოვრებელ სახლებთანაც მიდიან ახლოს.
„სადაც ფეხს გადაადგამ, ყველგან არიან. გორავენ და ყვირიან. იმ ჭალაშიც თხილი გვაქვს დარგული და თხილზე იყო მოსული.
ჩვენ პირუტყვი გავდენეთ იმ დღეს და ერთმანეთს შევეფეთეთ. ჩვენ რომ დავეგლიჯეთ, არაფერია და დათვი რომ მოვკლათ, ჯარიმაა. კანონი საქართველოში გავრცელებულ მურა დათვს იცავს, რადგან აღნიშნული ჯიში წითელ წიგნშია შეტანილი. როგორ უნდა მოგვარდეს ეს პრობლემა, არ ვიცი.
ტყეში თუ წახვალ და „ბომბაჩკები“ რომ არის პატარა, იმას თუ გაიქნევ და დააფრთხობ დათვს, ეს არის, სხვა გამოსავალი არ გვაქვს“, – ამბობს ვერიკო ზოიძე.
Loading ...