აშშ-ის ნაღმოსანი ხომალდები ბალტიისა და შავ ზღვებში ნატოს მოკავშირეებთან ერთად საზღვაო წვრთნებს ატარებენ

მიუხედავად კორონავირუსის პანდემიისა, ნატოს წევრი სახელმწიფოები აგრძელებენ სამხედრო მანევრებს, რომელიც მიზნად ისახავს ალიანსის საბრძოლო მზადყოფნის ამაღლებას თავდაცვის და შეკავების სტრატეგიის ფარგლებში.

ნატოს საიტის თანახმად, აშშ-ის სამხედრო-საზღვაო ძალების საესკადრო ნაღმოსანი ხომალდი “დონალდ კუკი”, და USS „პორტერი“ ნატოს მოკავშირე ქვეყნების გემებთან რამდენიმე ერთობლივ საზღვაო მანევრებში მონაწილეობენ რეგიონული სტაბილურობის საზღვაო ოპერაციების ფარგლებში.

“დონალდ კუკი”, ბალტიის ზღვაში შევიდა 11 აპრილს მას შემდეგ, რაც წყალქვეშა გემების წინააღმდეგ ბრძოლის უნარების სრულყოფის მიზნით ატლანტიკის ოკეანეში დიდი ბრიტანეთის ორგანიზებით გამართულ მანევრებში მიიღო მონაწილეობა.

ნაღმოსანი USS „პორტერი“ საერთაშორისო ყურეების გავლით 13 აპრილიდან იმყოფება შავ ზღვაში ნატოს მოკავშირეებთან და პარტნიორებთან საზღვაო უსაფრთხოების ოპერაციების ჩასატარებლად. ნატოს ოფისის თანახმად USS „პორტერმა“ სამანევრო ოპერაციები უკვე გამართა რუმინულ ფრეგატ „რეგინა მარიასთან“ ერთად.

ეს უკანასკნელი ნატოს სხვა ქვეყნების რამდენიმე ხომალდთან ერთად, ცოტა ხნის წინ, ფოთში გამართულ ერთობლივ საზღვაო წვრთნებში ღებულობდა მონაწილეობას.

ნატოს თანახმად, ამერიკული ნაღმოსნები, რომლებიც ესპანეთში, როტაში არიან ბაზირებული, ასრულებენ ისეთ მისიებს, როგორიცაა ზღვაზე უსაფრთხოების უზრუნველყოფა, ორმხრივი და მრავალმხრივი სწავლებების ჩატარება, ნატოს მუდმივი საზღვაო დაჯგუფების ფარგლებში პატრულირებისა და ანტისარაკეტო თავადაცვის ელემენტების გამოყენებით.

www.radiotavisupleba.ge