ჩოხატაურის მუნიციპალიტეტის საკრებულოში კომპანიამ, რომელიც კურორტ ბახმაროსთან მცირე ჰესის აშენებას აპირებს, საკრებულოს დეპუტატებს პროექტი წარუდგინა. შეხვედრას ხელისუფლების წარმომადგენლები, გარემოსდამცველები და საზოგადოებრივი ორგანიზაციების წარმომადგენლები ესწრებოდნენ. ჰესის აშენებას კურორტიდან 5 კილომეტრის დაშორებით კომპანია შპს ,,სი-სი-ი-ეიჩ ჰაიდრო VI” აპირებს. პროექტის თანახმად, კომპანია აქ 12 მგვტ სიმძლავრის მცირე ჰესის “ბახვი 1” – ის აშენებას გეგმავს, რასაც გარემოსდამცველთა დიდი ნაწილი და მოსახლეობის საინიციატივო ჯგუფი ეწინააღმდეგება. ისინი შიშობენ, რომ ჰესის აშენება ბახმაროს ჰავას უნიკალურობას დაუკარგავს და ეკოსისტემაზე და შესაბამისად, ტურიზმზე ნეგატიურად იმოქმედებს. კომპანიის წარმომადგენლების თქმით კი კვლევებში, მოახდენს თუ არა ჰესი აქაურ ეკოსისტემაზე გავლენას, მონაწილეობას უცხოელი ექსპერტები მიიღებენ და სამომავლო პროცესებიც მათი რეკომენდაციების შესაბამისად წარიმართება.