Cipher Brife-ის უფროსი საერთაშორისო კორესპოდენტი ია მეურმიშვილი ფეისბუქზე პოსტს აქვეყნებს, სადაც სხვადასხვა ქვეყანაში საპროტესტო აქციებისას დაკავებული მოქალაქეების სტატისტიკას განიხილავს და აქციების მონაწილეებისა და მათგან დაპატიმრებულებს შორის პროპორციულობას ერთმანეთს ადარებს.
”გრძელი პოსტი გამოვიდა, მაგრამ ვფიქრობ საინტერესო მონაცემებია დასკვნების გამოსატანად. მიმდინარე აქციების მსვლელობისას ამ დრომდე, საქართველოში 400-ზე მეტი ადამიანია დაკავებული – ქვეყნის მოსახლეობის, დაახლოებით, 0.01%. საქართველო პატარა ქვეყანაა და მისთვის ეს ძალიან მაღალი მაჩვენებელია. Alexandra Hall Hall-ის X-ზე პოსტის ნახვის შემდეგ დავინტერესდი ზოგიერთ ქვეყანაში პროტესტების დროს რამდენი ადამიანი იყო დაპატიმრებული. თითოეულ ამ ქვეყანაში სხვადასხვა დროს და სხვადასხვა მიზეზების გამო მასშტაბური დემონსტრაციები გაიმართა. მე ყველაზე მასშტაბური რაც მოვიძიე, მათზე ვწერ. ეს ცხადია, არ არის ამომწურავი ან ზუსტი სია. ასეთია მედიის მიერ დაკავებულ მომიტინგეთა შესახებ გავრცელებული მონაცემები:
ამერიკა: 2020 წლის რასობრივი სამართლიანობის საპროტესტო აქციები, რომლებიც ჯორჯ ფლოიდის გარდაცვალების შემდეგ დაიწყო, ამერიკის ისტორიაში ერთ-ერთი ყველაზე მასშტაბურ საპროტესტო მოძრაობად ითვლება, რადგან მასში ქვეყნის მასშტაბით 20-დან 26 მილიონამდე ადამიანი მონაწილეობდა. პოლიციამ ქვეყნის მასშტაბით 10,000-ზე მეტი ადამიანი დააკავა. (0,01% 35000 ადამიანი იქნებოდა)
დიდი ბრიტანეთი: 2019 წელს კლიმატის პროტესტებზე ლონდონში 1,000-ზე მეტი ადამიანი იქნა დაკავებული. (0.01% 9000 ადამიანი იქნებოდა)
იტალია: მასშტაბურ პროტესტებზე, მაგალითად, 2001 წელს დიდი რვიანის სამიტის დროს, დაახლოებით, 300 ადამიანი იქნა დაკავებული. (0.01% 6000 ადამიანი იქნებოდა)
საფრანგეთი: 2018 წელს, ეგრეთწოდებული, ყვითელი ჟილეტების პროტესტების დროს, რამდენიმე კვირის განმავლობაში, პოლიციამ 2,500-ზე მეტი პროტესტის მონაწილე დააკავა ქვეყნის მასშტაბით. (0.01% 7000 ადამიანი იქნებოდა)
გერმანია: 2017 წელს ჰამბურგში დიდი ოცეულის სამიტთან დაკავშირებული მასშტაბური პროტესტების დროს, რამდენიმე დღის განმავლობაში, დაახლოებით, 400 ადამიანი დააკავა. (0.01% 9000 ადამიანი იქნებოდა)
პოლონეთი: ბოლო პროტესტებზე, მაგალითად, 2020 წელს აბორტის კანონთან დაკავშირებული დემონსტრაციების დროს, დაკავებების რაოდენობა რამდენიმე ათეულს შეადგენდა. (0.01% 4000 ადამიანი იქნებოდა)
უნგრეთი: 2014 წელის ინტერნეტზე გადასახადის დაწესების წინააღმდეგ მასშტაბური დემონსტრაციები გაიმართა, მათ შორის, ერთ დღეს ბუდაპეშტში 100,000 ადამიანი გამოვიდა ქუჩაში. ამ მოვლენების დროს ექვსი პირი დააკავეს. (0.01% 1000 ადამიანი იქნებოდა)
აპრილში პრემიერ-მინისტრ ვიქტორ ორბანის მთავრობის წინააღმდეგ ათობით ათასი ადამიანი გამოვიდა საპროტესტო დემონსტრაციაზე. დაკავებების შესახებ ინფორმაცია არ მოიძებნება, სავარაუდოდ იმის გამო, რომ არავინ დაუკავებიათ. (0.01% 1000 ადამიანი იქნებოდა)
სლოვაკეთი: 2024 წელს რამდენიმე დიდი პროტესტი გაიმართა სასჯელაღსრულების კოდექსში ცვლილებებისა და საზოგადოებრივი მაუწყებლობის საკითხებთან დაკავშირებით. დემონსტრაციებში ათასობით ადამიანი მონაწილეობდა. დაკავებების შესახებ ინფორმაცია არ მოიძებნება,სავარაუდოდ იმის გამო, რომ არავინ დაუკავებიათ. (0.01% 600 ადამიანი იქნებოდა)
ბელარუსი: 2020 წლის საპროტესტო აქციების დროს ერთ დღეში, 8 ნოემბერს, დაჭერილი ადამიანების რაოდენობა 1000-ს აღემატებოდა. საპროტესტო დემონსტრაციების დროს და მათთან დაკავშირებით ქვეყანაში 30 000-ზე მეტი ადამიანია დაპატიმრებული. (0.01% 900 ადამიანი იქნებოდა)
რუსეთი: 2012 წლის 6 მაისს, მოსკოვში, ბოლოტნაიას მოედანზე „მილიონების მარშის“ დროს, პოლიციამ ასობით ადამიანი დააპატიმრა (ზუსტი მონაცემები უცნობია). მაშინდელ საპროტესტო გამოსვლებთან დაკავშირებით, სულ მცირე, 5170 ადამიანი დააპატიმრეს. პრეზიდენტ პუტინის წინააღმდეგ საპროტესტო დემონსტრაციებთან დაკავშირებით ჯამში დაკავებულთა ზუსტი მონაცემები არ არსებობს. უფლებადამცველების ინფორმაციით, ოპოზიციურად განწყობილ ადამიანებს ხშირ შემთხვევაში გამოგონილი ბრალდებებით აპატიმრებენ. (0.01% 15000 ადამიანი იქნებოდა)” – წერს ია მეურმიშვილი
კომენტარები
Loading ...
