2024-2025 სასწავლო წლიდან საქართველოში ზოგადი განათლების სისტემაში ახალი რეფორმა იწყება — განათლებისა და მეცნიერების სამინისტრო 20 საპილოტე სკოლაში პროფესიული პროგრამების ინტეგრირებას იწყებს, რაც უფროსკლასელებს (XI-XII კლასები) საშუალებას მისცემს, ატესტატთან ერთად პროფესიული განათლების დიპლომიც მიიღონ – ამის შესახებ მთავრობის მიერ პარლამენტში ინიციირებული კანონის პროექტის განმარტებით ბარათში წერია.
პროექტი “ოცნების” დეპუტატებმა დღეს განათლების კომიტეტზე მესამე მოსმენით მიიღეს.
ინიციატივა ითვალისწინებს, რომ იმ საშუალო პროფესიული საგანმანათლებლო პროგრამის დასრულების შემდეგ, რომელიც ზოგადი განათლების შედეგებსაც მოიცავს, მოსწავლეს ავტომატურად მიეცეს როგორც პროფესიული, ისე სრული ზოგადი განათლების დამადასტურებელი დოკუმენტი, რაც აქამდე პრაქტიკაში არ ხდებოდა.
განმარტებით ბარათში ვკითხულობთ, რომ სამინისტრო ამ ცვლილებით უზრუნველყოფს, რომ სკოლაშივე მიღებული პროფესიული კვალიფიკაცია სრულფასოვნად ჩაითვალოს და მოსწავლეს ერთდროულად გაუხსნას კარი როგორც შრომის ბაზარზე, ისე უმაღლეს განათლებაში.
რეფორმა ასევე ეხება მასწავლებელთა დასაქმების წესებს — ცვლილებით განისაზღვრა, რომ მასწავლებლად მუშაობის უფლება ექნებათ იმ პირებსაც, ვისაც უმაღლესი განათლების მიუხედავად არ აქვთ ეროვნული სასწავლო გეგმით განსაზღვრული საგნობრივი კვალიფიკაცია, თუმცა დაასრულეს მასწავლებლის მომზადების სპეციალური პროგრამა და ფლობენ შესაბამის სერტიფიკატს.
ცვლილებების პაკეტი ასევე ტექნიკურად ასწორებს ზოგიერთ ჩანაწერს — მათ შორის, განსაზღვრავს, რომ სკოლის დირექტორის მოადგილის უფლებამოსილება სწორედ განათლების მართვის საინფორმაციო სისტემაში დირექტორის რეგისტრაციის მომენტიდან შეწყდება და არა ფორმალური დანიშვნის თარიღიდან.
კანონპროექტი არ საჭიროებს დამატებით ხარჯებს სახელმწიფო ბიუჯეტიდან და, როგორც განმარტებით ბარათში წერია, მის ამოქმედებასთან ერთად „გაუმჯობესდება სწავლა-სწავლების პროცესი და შეივსება მასწავლებლის ვაკანსიები კვალიფიციური კადრებით“.
Loading ...