''არც ვიცოდი, თუ არსებობდნენ'' – ოზურგეთის საკრებულოს მწვანეების ფრაქცია დაიშალა

26 თებერვალს ოზურგეთის საკრებულომ ცნობად  მიიღო ფრაქცია ”ქართული ოცნება – მწვანეების” დაშლის თაობაზე. როგორც აღმოჩნდა, ფრაქცია დაიშალა, მაგრამ მისმა წევრებმა ახალი ფრაქცია ”ქართული ოცნება- ძლიერი თვითმმართველობისთვის” შექმნეს.

ეკოლოგიის  საკითხებთან დაკავშირებული რომელიმე გაერთიანების, ორგანიზაციის, არასამთავრობოსა თუ თუნდაც ფრაქციის დაშლა დღეს გურიაში უცნაური ამბავად აღიქმება, რადგან დღესდღეობით რეგიონსა და კონკრეტულად ოზურგეთში ეკოლოგიის თვალსაზრისით არაერთი პრობლემა არსებობს: კარიერული წარმოება მდინარეებზე, მეორადი ლითონის გადამამუშავებელი საწარმოს აშენების გეგმა ქალაქის ცენტრში, ჰესის მშენებლობის საკითხი სოფელ ვაკიჯვარში და მრავალი სხვა. ამ რეალობის გათვალისწინებით ფრაქციის წევრებმა, როგორც ჩანს, მაინც გადაწყვიტეს ეკოლოგიურ მიმართულებზე უარი ეთქვათ და ახალი ფრაქცია ამჯერად, თვითმმართველობის პროფილით შეექმნათ.

”გურიაTV” დაინტერესდა, კონკრეტულად რა საქმიანობა განახორციელა ფრაქციამ მისი არსებობის სამი წლის მანძილზე და ამ მიზნით ოზურგეთის მუნიციპალიტეტის საკრებულოსგან საჯარო ინფორმაცია გამოითხოვა.

როგორც მოწოდებული ინფორმაციიდან ირკვევა, ფრაქცია ”ქართული ოცნება – მწვანეები” 2018 წლის 8 იანვარს შექმნილა, მისი წევრები კი დეპუტატები: გენო ჩავლეშვილი, ხათუნა ცერცვაძე და მერაბ ბერიძე არიან. 

თუ ფრაქციის პოლიტიკურ პლატფორმას გადავხედავთ, შექმნის მომენტიდანვე ფრაქციას საკმაოდ ამბიციური გეგმების შესრულება დაუსახავს მიზნად:

ძლიერი და დამოუკიდებელი სახელმწიფოს ჩამოყალიბება;

სახელმწიფო პატრიოტიზმის, ეროვნული მსოფლმხედველობის და იდეალების დამკვიდრება;

საუკეთესო გარემოსდაცვითი ტექნოლოგიების გამოყენება;

ტყის აღდგენის ღონისძიებების განხორციელება;

ეკოლოგიური და აგრარული ტურიზმის განხორციელების ხელშეწყობა;

სარეკრეაციო ინფრასტრუქტურის განვიტარება და გამწვანებული ტერიტორიების ზრდა;

ეს ფრაქციის გეგმების არასრული ჩამონათვალია. ასეთი მასშტაბური გეგმების ფონზე, ჩვენ დავინტერესდით, რა საქმიანობა განახორციელა ფრაქციამ მისი არსებობის სამი წლის მანძილზე და ზემოთ ჩამოთვლითაგან რომელი ამოცანის გადაჭრა შეძლო.

”მწვანეების” აქტივობების სია, რომელიც საკრებულოსგან მივიღეთ, ასეთია:

ფრაქცია „ ქართული ოცნება-მწვანეები“-ს   მიერ, ფრაქციის შექმნის დღიდან- 2021 წლის 22 თებერვლამდე   ჩატარებულ იქნა 27 სხდომა;

ფრაქციის ფორმატში იმსჯელეს და მხარი დაუჭირეს:

ოზურგეთის მუნიციპალიტეტის საზღვრებში არსებულ ბულვარში,პარკში,სკვერში ან პლაჟზე წვრილფეხა და მსხვილფეხა პირუტყვის მეთვალყურეობის ქვეშ ან მეთვალყურეობის გარეშე ყოლის წესების პროექტის მომზადებას;

კურორტ გომისმთის მიწათსარგებლობის გენერალური გეგმის პროექტის  დასამტკიცებლად დაკავშირებული ღონისძიებების შემუშავებას;

ოზურგეთის მუნიციპალიტეტის ტერიტორიაზე ბინადარი შინაური ცხოველების (ძაღლი,კატა და სხვა კომპანიონი ცხოველები)მოვლა-პატრონობის და მათი პოპულაციის მართვის წესის პროექტის შენიშვნების და რეკომენდაციების შემუშავებას;

ფრაქცია „ქართული ოცნება – მწვანეები’’ აქტიურად იყო ჩართული ოზურგეთის მუნიციპალიტეტის გამჭვირვალობისა და კეთილსინდისიერების ამაღლების 2019-2022 წლების სტრატეგიით გათვალისწინებული ვალდებულებების შესრულების მონიტორინგისა და შეფასების მიზნით დროებითი სამუშაო ჯგუფში;

ფრაქცია აქტიურად თანამშრომლობდა ორგანიზაცია საქართველოს მწვანეთა მოძრაობა/დედამიწის მეგობრების მიერ დაგეგმილ ღონისძიებებში; – ეს გახლავთ  ფრაქციის სამუშაო მიმართულებასთან შედარებით ყველაზე ახლოს მდგომი აქტივობები, რომელიც მათ მთელი სამი წლის განმავლობაში განახორციელეს.

იმის გათვალისწინებით, რომ ოზურგეთში გარემოსდაცვის მიმართულებით არაერთი ორგანიზაცია მუშაობს და ამ მხრივ არსებული უამრავი პრობლემის გადაჭრას სხვადასხვა, მათ ხელთ არსებული შესაძლებლობებით ცდილობს, ჩვენ გარემოსდაცვით ორგანიზაცია ”ეკოს” ფრაქცია ”ქართული ოცნება – მწვანეები”-თან თანამშრომლობის შესახებ ვკითხეთ. 

– ჩვენ არაერთი აქცია გვქონია ოზურგეთში არსებულ ეკოლოგიურ პრობლემებთან დაკავშირებით, იცით, რამდენად აქტიურები ვართ და მუდამ ვცდილობთ ჩვენი წვლილი შევიტანოთ ჩვენი მწვანე გარემოს შენარჩუნების საქმეში. მთელი ამ ხნის მანძილზე მაგ ფრაქციის ერთი წევრიც კი არ მინახავს ჩვენს აქციაზე მოსული ან ჩვენი საქმიანობით დაინტერესებული. არასდროს უთანამშრომლიათ ჩვენთან და არც საკრებულოში მიგრძვნია მათი მხარდაჭერა. საერთოდ, თუ არსებობდნენ არ ვიცოდი და ახლა დაშლილან კიდეც თურმე –  განაცხადა გარემოსდაცვითი ორგანიზაცია ”ეკოს” დამფუძნებელმა ირმა გორდელაძემ.

თავის მხრივ, საკმაოდ შთამბეჭდავად გამოიყურება თანხა, რომელიც ფრაქციამ ბიუჯეტიდან ხელფასების სახით მიიღო. ფრაქციის თავმჯდომარის გენო ჩავლეშვილის ხელზე ასაღები ანაზღაურება 1600 ლარია, ხოლო მისი მოადგილის ხათუნა ცერცვაძის – 1200 ლარი. თუ ამ თანხას სამ წელზე დავთვლით, ცხადი იქნება, რამხელა ფინანსური რესურსი გაიღო ბიუჯეტმა აღნიშნული ფრაქციის იმ საქმიანობისთვის, რომელიც ზემოთ არის ჩამოთვლილი. 26 თებერვლიდან კი ოზურგეთში არსებული ეკოგარემოს გაძლიერების შემდეგ ფრაქციის წევრებმა ზრუნვა თვითმმართველობაზე გადაწყვიტეს და შექმნეს კიდეც ფრაქცია ”ძლიერი თვითმმართველობისთვის”.  რა საქმიანობას გასწევს და რა შრომას ჩადებს ამ მიმართულების გაძლიერებაში ფრაქცია, ამის მომსწრე ამომრჩეველი მალე გახდება.