არსებობს თუ არა ანტისხეულების მაჩვენებელი, რომლის დროსაც აცრა არ კეთდება – ინფექციონისტის განმარტება

რა არის ანტისხეული და არის თუ არა განსაზღვრული კონკრეტული ნორმა, რომელიც ვირუსთან გასამკლავებლად აუცილებელია – კორონავირუსის წინააღმდეგ ვაქცინირების ფონზე ეს კითხვა მეტად აქტუალური გახდა.

რა არის ანტისხეული?

როცა ორგანიზმში უცხო ნივთიერება, ანუ ანტიგენი იჭრება, იმუნური სისტემა ორგანიზმის დაცვის მიზნით, მის წინააღმდეგ ანტისხეულებს გამოიმუშავებს.

საჭიროა თუ არა კოვიდ ვაქცინის გაკეთებამდე ანტისხეულების გაზომვა? 

როგორც ინფექციონისტი ალექსანდრე გოგინავა “რუსთავი 2”-თან საუბრისას განმარტავს, ჯერჯერობით არცერთი კვლევის თანახმად არ არის ცნობილი, რა რაოდენობის ანტისხეული იცავს ადამიანს ინფიცირებისგან.

“ჯერჯერობით ცნობილი არ არის, რა რაოდენობის ანტისხეულები იცავს ადამიანს ინფიცირებისგან. არ არის აუცილებელი ანტისხეულები განისაზღვროს კოვიდ-ვაქცინის წინ.

თუ ჩვენ გადავიტანეთ ეს დაავადება და მას შემდეგ გასულია 4 თვეზე მეტი, ანტისხეულების განსაზღვრის გარეშეც შეგვიძლია გავიკეთოთ ვაქცინა და ამას არ აქვს უკუჩვენება.

ზუსტი ნიშნული არ არსებობს, რის ქვემოთ უნდა გავიკეთოთ და რის ზემოთ არ უნდა გავიკეთოთ.

ეს არის დამყარებული სხვადასხვა კვლევებზე და თუ მაღალი ტიტრით აქვთ 10-15-ჯერ მეტი, დაცულები არიან ასეთი ადამიანები და ასეთ დროს შესაძლოა ექიმმა ურჩიოს, რომ არ გაიკეთონ ვაქცინა.

მინდა მოვუწოდო ადამიანებს, რუტინულად არ არის აუცილებელი ამ კვლევის კეთება. ვირუსის გადატანიდან 4 თვეში შეუძლიათ გაიკეთონ.

რაც შეეხება ნორმას, ესეც არ არის ზუსტად განსაზღვრული, ყველა ლაბორატორიაში სხვადასხვაგვარად ითვლება, ამიტომ ზუსტი ციფრის თქმა შესაძლებელი არ არის,”- აღნიშნა ალექსანდრე გოგინავამ.

წყარო: alia.ge