“საქართველოს ბანკის” ქუთაისის ფილიალში უკვე თითქმის სამი საათია 12 ადამიანი შეიარაღებულ თავდამსხმელს მძევლად ჰყავს აყვანილი. ის ითხოვს ორ მილიონ ამერიკულ დოლარს და ვერტმფრენს.
დადასტურებით შეიძლება ითქვას, რომ მძევლად აყვანილი ადამიანებიდან ორი “საქართველოს ბანკის” თანამშრომელია: ერთ-ერთი მარიამ სანებლიძეა, რომელმაც დედისთვის მხოლოდ რამდენიმე სიტყვის თქმა მოასწრო, მეორე კი ჟანა გუმბერიძე, რომლის Facebook-გვერდითაც ვიდეოები ვრცელდება.
“საქართველოს ბანკის” თანამშრომლის მიერ გავრცელებულ ვიდეოში 10 მძევლის ამოცნობაა შესაძლებელი, მათ შორის ხუთი ქალი და ხუთი კაცია – მათი სახეები ჩანს. კაცებს ხელები შეკრული აქვთ, ქალებს – არა.
თავდამსხმელი სამართალდამცავებთან საკონტაქტოდ მძევლად აყვანილ ადამიანებს იყენებს, მათ შორის ამავე ბანკის თანამშრომელს.
- “არ გამომაჩინო, თორემ მამაჩემი მოკვდება“, – ისმის ერთ-ერთი მძევლის ხმა.
- გავრცელებულ ერთ-ერთ ვიდეოში მძევალი ოჯახის წევრს ამშვიდებს: “მამა, ნუ გეშინია, ყველაფერი კარგად იქნება”.
- მძევლებს შორის, სავარაუდოდ, დედა-შვილიც არის – ვიდეომასალაში ისმის ერთი ქალის ხმა, რომელიც ელაპარაკება, სავარაუდოდ, სამართალდამცავს და უხსნის, რომ “ერთი შვილი მკვდარი მყავს და მეორესაც ნუ მოაკვლევინებ, ღვთისნიერი ადამიანი ვარ“.
“საქართველოს ბანკში” შეიარაღებული ადამიანის შეჭრის შესახებ ცნობა მედიაში დაახლოებით 11:00 საათზე გავრცელდა. დამატებით ინფორმაციას არ ავრცელებს თავად ბანკი.
შინაგან საქმეთა სამინისტრომ გამოძიება ოთხი მუხლით დაიწყო. შსს-ის ინფორმაციით, შენობაში 12 ადამიანია მძევლი.
გამოძიება დაწყებულია:
- მუხლი 144 – მძევლად ხელში ჩაგდება;
- მუხლი 236 – საბრძოლო მასალის უკანონოდ შეძენა-შენახვა-ტარება;
- მუხლი 323 – ტერორისტული აქტი;
- მუხლი 329 – მძევლად ხელში ჩაგდება ტერორისტული მიზნით.
სოციალურ ქსელში ქუთაისში, “საქართველოს ბანკში” მყოფი ერთ-ერთი მძევლის ვიდეო ვრცელდება. კადრებში ისმის სავარაუდო თავდამსხმელის ხმაც, რომელიც მძევალს კარნახობს საკუთარ მოთხოვნებს, მათ შორის თანხას და სავარაუდო დროს.
Loading ...
