”არ ვეთანხმები ვასო ჩიგოგიძეს” – ოზურგეთის თეატრის მსახიობი ირაკლი ურუშაძე

ოზურგეთის დრამატული თეატრის მსახიობი ირაკლი ურუშაძე სოციალურ ქსელში პოსტს აქვეყნებს და აცხადებს, რომ თეატრი ხელისუფლების მიმართ კრიტიკული უნდა იყოს.

”მე ვმუშაობ ოზურგეთის დრამატულ თეატრში. ბ. ვასო ჩიგოგიძემ გუშინ დააფიქსირა თავისი მოსაზრება მიმდინარე მოვლენებთან დაკავშირებით.რა თქმა უნდა ყველას აქვს თავისი აზრის დაფიქსირების უფლება. მე როგორც ოზურგეთის დრამატული თეატრის მსახიობი არ ვეთანხმები ბ. ვასო ჩიგოგიძეს ამ მოსაზრებაში და ვფიქრობ საიდანაც საშუალება გეძლევა მსახიობს თუ სხვა სფეროს წარმომადგენელს იქიდან უნდა დააფიქსირო შენი აზრი! თეატრი არ უნდა იყოს რომელიმე ერთი პოლოტიკური თუ პიროვნების საქმის გამტარი. ის ყოველთვის კრიტიკული უნდა იყოს ხელისფუფლების მიმართ. ბრძოლას ყოველთვის აქვს აზრიწინ ევროპისკენ” – წერს ირაკლი ურუშაძე.

მსახიობის აღნიშნული განცხადება ოზურგეთის დრამატული თეატრის სამხატვრო ხელმძღვანელის ვასო ჩიგოგიძის განცხადებას მოჰყვა, რომელიც მან სოციალურ ქსელში გამოაქვეყნა და ვასო აბაშიძის სახელობის სახელმწიფო თეატრში სცენიდან მსახიობ დავით ბეშიტაიშვილის განცხადება გააკრიტიკა.

”სახელმწიფო თეატრი ერთი პოლიტიკური მოსაზრების ან ჯგუფის მოქმედების არეალი როგორ გახადე, ძამი. ჩვენც გვაქვს ჩვენი აზრი და ჩვენც ვართ სამხატვრო ხელმძღვანელები და არ ვფიქრობთ, რომ „გამჭვირვალობა დაუშვებელია“. სასაცილოდაც კი ჟღერს ასეთი რამის თქმა დღეს. თანაც თქვენ ჩემზე უმცროსები ხართ და ჩემზე მეტი ხომ უნდა გესმოდეთ ამჟამინდელ მსოფლიოში რამხელა გამოწვევები აქვს ჩვენს ქვეყანას. ნუ ავიგდებთ თავს მასხრად. ჩვენ ჩვენ საქმეს მივხედოთ.” – დაწერა ვასო ჩიგოგიძემ ფეისბუქის საკუთარ გვერდზე.

შეგახსენებთ, რომ  ორი დღის წინ ვასო აბაშიძის სახელობის სახელმწიფო თეატრში სპექტაკლის დასრულების შემდეგ მსახიობმა დავით ბეშიტაიშვილმა სცენიდან  „უცხოური გავლენის გამჭვირვალობის შესახებ“ კანონი გააპროტესტა და განაცხადა ”არა რუსულ კანონს”, რასაც მსახიობების და დარბაზის ტაში მოჰყვა.