„ქართული ოცნების“ მიერ გატარებული რეფორმის შედეგად, ჩვენ ორად ორი რამ მივიღეთ – უზარმაზარი საერთაშორისო კრიტიკა და უვადოდ გამწესებული ჩინჩალაძე-მურუსიძის „კლანი“, ახლა უკვე უზენაეს სასამართლოში, – განაცხადა პოლიტიკური გაერთიანების „ლელო საქართველოსთვის“ წევრმა ანა ნაცვლიშვილმა უზენაესი სასამართლოს მოსამართლეთა დანიშვნასთან დაკავშირებით ეუთო/ოდირის ანგარიშის თაობაზე.
მისივე თქმით, დასკვნაშიც წერია, რომ პროცესი პოლიტიკური ზეგავლენისგან დაცული არ იყო.
„ეუთოს ადამიანის უფლებებისა და დემოკრატიული ინსტიტუტების ოფისის მიერ ამ დასკვნაში მწვავედ და კრიტიკულად არის შეფასებული უზენაესი სასამართლოს მოსამართლეების შერჩევის პროცესი, რომელსაც ჩვენ პირველივე დღიდან, ჯერ კიდევ მაშინ, როდესაც კანონპროექტი მზადდებოდა პარლამენტში, ვაკრიტიკებდით. ვხედავდით, რომ ეს პროცესი იყო სრული ფარსი, ის არ ემსახურებოდა უზენაესი სასამართლოს დაკომპლექტებას კეთილსინდისიერი და პროფესიონალი კადრებით, არამედ ემსახურებოდა ერთადერთ რამეს, რომ „ქართულმა ოცნებამ“ მიიტაცოს და ჯიბეში ჩაიდოს საქართველოში სასამართლოს უზენაესი და ბოლო ინსტანცია“, – აცხადებს ანა ნაცვლიშვილი.
მისი სიტყვებით, გატარებულ რეფორმას მხოლოდ უზარმაზარი საერთაშორისო კრიტიკა მოჰყვა და არა სამართლიანი და დამოუკიდებელი სასამართლო. ანა ნაცვლიშვილის თქმით, დასკვნაში საუბარია არა მარტო იმ პროცესზე, რომელიც პარლამენტში განვითარდა, არამედ იმაზეც, რა პროცესების ფონზე მიმდინარეობდა მოსამართლეთა არჩევა.
„გახსოვთ თქვენ ის დაძაბულობა, რომელიც იყო ამ პროცესის პარალელურად. ფაქტობრივად, უპრეცედენტო რამ ვიხილეთ ჩვენ, მსოფლიოს ისტორიას ასეთი რამ არ ახსოვს, როცა პიკეტირების რეჟიმში, თავდაცვის რეჟიმში და პოლიციის კორდონით გარშემორტყმულმა პარლამენტმა აირჩია ადამიანები, რომლებმაც ამ ქვეყანაში სამართალი უნდა განაგონ“, – განაცხადა ანა ნაცვლიშვილმა.
დემოკრატიული ინსტიტუტებისა და ადამიანის უფლებათა ოფისმა, საქართველოს უზენაესი სასამართლოს მოსამართლეთა წარდგენისა და დანიშვნის შესახებ მეორე ანგარიში 9 იანვარს გამოაქვეყნა. ეუთო/ოდირის წარმომადგენლები უზენაესი სასამართლოს მოსამართლეთა არჩევის საკითხს საქართველოს სახალხო დამცველის მოწვევით სწავლობდნენ.
მოცულობითი ანგარიშის თანახმად, პარლამენტმა გადამწყვეტი როლი ითამაშა მოსამართლეთა დანიშვნის პროცესში, თუმცა ვერ უზრუნველყო, რომ პროცესი დაცული ყოფილიყო მიკერძოებული პოლიტიკისგან და თანხვედრაში ყოფილიყო კარგ საერთაშორისო პრაქტიკასთან.
„საქართველოში უზენაესი სასამართლოს მოსამართლეთა დანიშვნის სისტემის ბოლოდროინდელი რეფორმები წარმოადგენს მნიშვნელოვან ნაბიჯს სასამართლო ხელისუფლების დამოუკიდებლობის გასაძლიერებლად, თუმცა, სამართლებრივი ჩარჩო არ არის პრევენციული ხასიათის მატარებელი, პროცესზე მიკერძოებული პოლიტიკის გავლენის წინააღმდეგ და არ იძლევა გარანტიას, რომ გადაწყვეტილებების მიღება ობიექტური, დამსახურების შესაბამისი კრიტერიუმების საფუძველზე ხდება, რაც საერთაშორისო სტანდარტებს და კარგ პრაქტიკას ეწინააღმდეგება. პროცესის მიმდინარეობისას იუსტიციის უმაღლეს საბჭოს და პარლამეტს მეტი ძალისხმევა დასჭირდა პროცესის დასარეგულირებლად, რათა უზრუნველყოფილიყო ობიექტურობა, სამართლიანობა, თანმიმდევრულობა და წესრიგი, და ასევე გადაჭრილიყო ინსტიტუციისა და პროცესისადმი საზოგადოებრივი ნდობის საკითხი. აგრეთვე მოსამართლეთა დასანიშნად პლენარული კენჭისყრის გაგრძელების გადაწყვეტილება, პოლიტიკური კრიზისის, ოპოზიციის ბოიკოტის, პროცესის გადადების მოწოდების და კომიტეტსა და პლენარულ სხდომაზე არსებული მნიშვნელოვანი შეფერხებების ფონზე ეჭვქვეშ აყენებს ხელისუფლების მიზნის გულწრფელობას – პროცესი ყოფილიყო ღია, გამჭვირვალე, რომელიც უზრუნველყოფს ფართო პოლიტიკურ მხარდაჭერას და ზრდის საზოგადოების ნდობას სასამართლო ხელისუფლების მიმართ“, – ნათქვამია ანგარიშში.
www.radiotavisupleba.ge
Loading ...