ამირან გამყრელიძე – შემთხვევათა დაახლოებით 90% არის ასიმპტომური, მსუბუქი და საშუალო სიმძიმით

დაავადებათა კონტროლის ეროვნული ცენტრის დირექტორი, ამირან გამყრელიძე პირებს, რომელთაც კორონავირუსის სიმპტომები აღენიშნებათ, რეკომენდაციით მიმართავს.

როგორც გამყრელიძემ ჯანდაცვის მინისტრთან ეკატერინე ტიკარაძესთან და კლინიკური ჯგუფის წამომადგენლებთან შეხვედრის შემდეგ ჟურნალისტებს განუცხადა, ვირუსის სიმპტომების აღმოჩენის შემთხვევაში პირი იზოლაციაში უნდა გადავიდეს და თავიდანვე ტესტის გაკეთება საჭირო არაა.

„მინდა მივმართო მოსახლეობას, რომ სიმპტომების აღმოჩენის შემთხვევაში არ არის აუცილებელი, რომ ტესტზე ვიაროთ. სასურველია, რომ გადავიდეთ იზოლაციაში, დავრეკოთ 112-ზე ან ოჯახის ექიმთან და შემდეგ ჩავიტაროთ ტესტირება. იმიტომ, რომ დღეს უკვე სიმპტომებიანის ყოველი მე-5, მე-6 შემთხვევა არის კოვიდინფიცირებული და მისი ყველაზე კარგი მოვლა გახლავთ სწრაფად გადასვლა თვითიზოლაციაში. შემთხვევათა უმეტესობა, დაახლოებით 90% არის ასიმპტომური, მსუბუქი და საშუალო სიმძიმით მიმდინარე. დანარჩენი 10%-მდე გვაქვს მძიმე და კრიტიკული შემთხვევები“,- განაცხადა გამყრელიძემ.