დაავადებათა კონტროლის ეროვნული ცენტრის ხელმძღვანელი, ამირან გამყრელიძე, იმედს გამოთქვამს, რომ მომავალი კვირის სამშაბათიდან, ლუგარის ლაბორატორიას ექნება საშუალება დაადგინოს კორონავირუსის ის ქვეტიპი, რომელიც ჩინეთსა და მსოფლიოს 10 ქვეყანაში გავრცელდა. ამის შესახებ მან 30 იანვარს გამართულ პრესკონფერენციაზე განაცხადა:
„ამ დაავადების ლაბორატორიული დიაგნოსტიკის საშუალება აქვს რამდენიმე ჩინურ ლაბორატორიას და რამდენიმე ევროპულ ლაბორატორიას. ჩვენ კონტაქტი გვაქვს ჩვენს პარტნიორებთან და ძალიან დიდი იმედი მაქვს, რომ იმ კვირის დასაწყისში უკვე გვექნება საშუალება, რომ კორონავირუსის ეს ქვეტიპი დავადგინოთ ლუგარის ლაბორატორიაში. დღეს ვადგენთ კორონავირუსის ხუთი ტიპის ვირუსს და 20-მდე რესპირატორულ ვირუსს და მივდივართ გამორიცხვის მეთოდით, მაგრამ სწორედ ამ ქვეტიპის დადგენის საშუალება გვექნება სამშაბათიდან, ოთხშაბათიდან”.
30 იანვრის დილის მონაცემებით, მსოფლიოში კორონავირუსის ლაბორატორიულად დადასტურებული 7 711 შემთხვევა ფიქსირდება. ბოლო ერთი დღის განმავლობაში შემთხვევათა რაოდენობა გაიზარდა 1 737-ით. გარდაცვლილია 170 ადამიანი. 31 დეკემბრიდან დღემდე, დაავადების ექსპორტი მოხდა 11 ქვეყანაში.
დაავადებათა კონტროლის ეროვნული ცენტრის ინფორმაციით, საქართველოში კორონავირუსის არცერთი შემთხვევა არ არის დაფიქსირებული.
Loading ...