ამირან გამყრელიძე – ინფიცირების დინამიკა მოდის ქვემოთ, რაც გარკვეული მანიშნებელია იმისა, რომ სტაბილიზაციის ელემენტები პიკში უკვე გამოჩნდა

ბოლო 2 კვირის განმავლობაში დადებითობის მაჩვენებელი მცირდება – 32-31% გვქონდა, ბოლო 2 დღე გვაქვს 28%. დინამიკა დადებითობის პროცენტისა მოდის ქვემოთ, რაც გარკვეული მანიშნებელია იმისა, რომ შესაძლებელია სტაბილიზაციის ელემენტები ამ პიკში უკვე გამოჩნდა, – ამის შესახებ დაავადებათა კონტროლის ეროვნული ცენტრის ხელმძღვანელმა ამირან გამყრელიძემ მთავრობის ადმინისტრაციაში, უწყებათაშორისი საკოორდინაციო საბჭოს სხდომის დასრულების შემდეგ განაცხადა.

მისივე ინფორმაციით, ქვეყანაში გამოჯანმრთელების მაჩვენებელი 83%-ია, რაც ასევე კარგი შედეგია.

„ჩვენ დღეს 4673 ინფიცირებული გვყავს, აქედან 1100 გამოვლენილია PCR ტესტით და 3573 ანტიგენის ტესტით. გასულ 24 საათში ჩატარებულია 16646 ტესტი, აქედან 11400 ანტიგენით და 5246 PCR ტესტი. დადებითობით მაჩვენებელი მთლიანად გვქონდა 10%. ბოლო 2 კვირის განმავლობაში დადებითობის მაჩვენებელი მცირდება, 32-31% გვქონდა, ბოლო 2 დღე გვაქვს 28% დინამიკა დადებითობის პროცენტისა მოდის ქვემოთ, რაც გარკვეული მანიშნებელია იმისა, რომ სტაბილიზაციის ელემენტები ამ პიკში უკვე გამოჩნდა. დღეს გამოჯანმრთელდა 4000-მდე ადამიანი, გამოჯანმრთელების პროცენტი 83-ია, რაც ასევე კარგია“, – აღნიშნა ამირან გამყრელიძემ.