“ამას არ დავუშვებ” – ტრამპის თქმით, ისრაელის მიერ დასავლეთ სანაპიროს ანექსია არ მოხდება

25 სექტემბერს აშშ-ს პრეზიდენტმა დონალდ ტრამპმა თქვა, რომ ისრაელს დასავლეთ სანაპიროს ანექსიის საშუალებას არ მისცემს.

“არ დავუშვებ ისრაელის მიერ დასავლეთ სანაპიროს ანექსიას. ეს არ მოხდება,” განუცხადა ტრამპმა ოვალურ ოფისში შეკრებილ რეპორტიორებს და დაამატა, რომ ამ საკითხზე პრემიერმინისტრ ბენიამინ ნეთანიაჰუსაც ესაუბრა.

“ისრაელს დასავლეთ სანაპიროს ანექსიის უფლებას არ მივცემ, ეს არ მოხდება, ახლა გაჩერების დროა.” – აღნიშნა აშშ-ს პრეზიდენტმა.

ამ კვირის დასაწყისში ისრაელელმა მაღალჩინოსანმა გამოცემა Times of Israel-ს უთხრა, რომ დასავლეთის რამდენიმე ქვეყნის მიერ პალესტინის სახელმწიფოებრიობის აღიარების შემდეგ ტრამპის ადმინისტრაციამ ნეთანიაჰუ დასავლეთ სანაპიროს ანექსიის თაობაზე გააფრთხილა, თუმცა, ისრაელისთვის ეს გაფრთხილება “დისკუსიის დასასრული” არ ყოფილა. მაღალჩინოსნის თქმით, ნეთანიაჰუმ მოლაპარაკებების გაგრძელება თეთრ სახლში ვიზიტამდე გადადო, რაც შემდეგ კვირას გაიმართება.

25 სექტემბერს, გაეროს გენერალური ასამბლეის პარალელურად მუსლიმ და არაბ ლიდერებთან შეხვედრის შემდეგ, ტრამპმა განაცხადა, რომ აშშ “რაღაც დონის შეთანხმების მიღწევასთან ახლოსაა.”

ამას გარდა, სექტემბრის დასაწყისში The Times of Israel-თან ინტერვიუში არაბთა გაერთიანებული საამიროების მაღალჩინოსანმა განაცხადა, რომ დასავლეთ სანაპიროს ანექსია იქნებოდა “წითელი ხაზი”, რომელიც რეგიონულ ინტეგრაციას “დაასრულებდა”.

“ისრაელს უნდა მოველაპარაკო, მათ იციან, რაც მინდა. ვფიქრობ ეს მიღწევადია, რადგან ბევრი ადამიანი იღუპება.” – თქვა ტრამპმა.

ცნობისთვის, 22 სექტემბერს გაეროს გენერალურ ასამბლეაზე პალესტინის სახელმწიფოებრიობა მონაკომ, ლუქსემბურგმა, ბელგიამ, მალტამ და ანდორამ აღიარეს მას შემდეგ, რაც წინა დღით იგივე ნაბიჯი გაერთიანებულმა სამეფომ, კანადამ ავსტრალიამ და პორტუგალიამ გადადგა.

აღსანიშნავია, რომ გაერთიანებული სამეფოს, ავსტრალიისა და კანადის მხრიდან პალესტინის სახელმწიფოებრიობის აღიარების შემდეგ, ჰამასის ტერორისტული ორგანიზაციის მაღალჩინოსანმა ბოლო დროს განვითარებულ მოვლენებს “გამარჯვება” უწოდა.