„ამ ეტაპზე საქართველოში ჯერ კიდევ მწვავე, ვირუსული ინფექციების სეზონური მატების პერიოდია“ – ივანე ჩხაიძე

„ამ ეტაპზე საქართველოში ჯერ კიდევ მწვავე რესპირაციული ვირუსული ინფექციების სეზონური მატების პერიოდია“, – ამის შესახებ იაშვილის სახელობის ბავშვთა ცენტრალური საავადმყოფოს სამედიცინო დირექტორმა, ივანე ჩხაიძემ „ფორტუნას“ განუცხადა.

ივანე ჩხაიძის თქმით, გრიპის და გრიპისმაგვარი დაავადებების გავრცელების პიკი თებერვლის თვეში, გასულ კვირას უკვე იყო და მოლოდინი აქვთ, რომ მომდევნო კვირების განმავლობაში შემთხვევების რაოდენობა შემცირდება:

„იანვრიდან თებერვლის პირველი ნახევრის ჩათვლით, იდენტიფიცირებული ვირუსებიდან ყველაზე მეტი გრიპის ვირუსია, ხოლო გავრცელებულ გრიპის ვირუსებს შორის ყველაზე მეტს, 41 %-ს A ტიპის ვირუსი წარმოადგენს.

გავრცელების მიხედვით, უკვე რამდენიმე კვირაა მეორე ადგილზეა რესპირაციულ-სენსიტიური ვირუსი. მისთვის დამახასიათებელია 2 წლამდე ასაკის ბავშვებში ბრონქიოლიტის განვითარება. აღნიშნულმა ვირუსმა ასევე შეიძლება გამოიწვიოს ფილტვების ანთება როგორც მცირე ასაკის ბავშვებში, ასევე 65-წელს გადაცილებულ მოსახლეობაში“, – ამბობს ივანე ჩხაიძე და აღიშნავს, რომ ყველა ის ვირუსი, რომელიც დღეს საქართველოშია გავრცელებული, გრიპის ვირუსისგან განსხვავებულია:

„მხოლოდ გრიპის ვირუსს ახასიათებს მაღალი ტემპერატურა – 38 გრადუსი და მეტი, ძლიერი სისუსტე, თავის, ყელის, კუნთების და სახსრების ტკივილი, ხველა, უმადობა – ამ ნიშნების შემთხვევაში უნდა მივიჩნიოთ, რომ საქმე გრიპის ვირუსთან გვაქვს.

მისივე თქმით, „კორონავირუსი არსად წასულა და ბოლო კვირების განმავლობაში კოვიდ-19-ის შემთხვევები მუდმივად ფიქსირდება:

„საერთო ვირუსებში მისი ხვედრითი წილი 2, 3, მაქსიმუმ 10 %-ია. ის ჩვეულებრივი სეზონური ვირუსი გახდა. მოლოდინი, რომ კორონავირუსმა მომდევნო კვირების განმავლობაში მოიმატოს, არ გვაქვს“, – აღნიშნა ივანე ჩხაიძემ „ფორტუნასთან“.