”ათეულობით ბავშვია ინფიცირებული” – რა ხდება ჩოხატაურის სკოლებში

დაბა ჩოხატაურის N 1 საჯარო სკოლაში, სადაც 700 – ზე მეტი მოსწავლეა, კორონავირუსის გავრცელების გამო სასწავლო პროცესი შვიდ კლასში, სწავლის დაწყებისთანავე დისტანციურად გადავიდა. მოგვიანებით კი ამ ციფრს ორი კლასი დაემატა. მოსწავლეებში კორონავირუსის გავრცელების მაღალი მაჩვენებლის დაფიქსირების გამო, საგანმანათლებლო რესურსცენტრმა აღნიშნული სკოლის დისტანციურ სწავლებაზე გადაყვანის გადაწყვეტილება, ეპიდემიოლოგებთან შეთანხმებით, მიიღო. როგორც ჩოხატაურის საგანმანათლებლო რესურსცენტრის ხელმძღვანელმა შორენა სიხარულიძემ განაცხადა, ჩოხატაურის N1 საჯარო სკოლაში ამ ეტაპისთვის 9 კლასი და ათეულობით ბავშვია ინფიცირებული. საბედნიეროდ კორონავირუსის შემთხვევები არ ფიქსირდება პედაგოგებში, რომელთა 80% ვაქცინირებულია. თუმცა იგივე არ ითქმის ჩოხატაურის სამრევლო სკოლაზე. აქ 7 პედაგოგს უკვე დაუდგინდა კოვიდ 19 და სკოლაში ვირუსის გავრცელების წყარო სწორედ ისინი გახდნენ. როგორც სიხარულიძემ აღნიშნა, სამრევლო სკოლაში პედაგოგთა მხოლოდ 30 % – ია ვაქცინირებული. რაც შეეხება ჰიბრიდულ სწავლებას, ჩოხატაურის მუნიციპალიტეტში სასწავლო პროცესს ამ პრინციპით სოფელ გუთურის, შუა ფარცხმისა და ბასილეთის სკოლები ორი კვირით აგრძელებენ.