17 ქვეყნის მოქალაქეებს საქართველოში უვიზოდ შემოსვლა უმკაცრდებათ. კერძოდ, “ოცნების” მთავრობის 17 აპრილის დადგენილების თანახმად, დამტკიცდა იმ ქვეყნების ჩამონათვალი, რომელთა მოქალაქეებსაც არაბთა გაერთიანებული საამიროების, ბაჰრეინის, საუდის არაბეთის, კატარის, ქუვეითის და ომანის მრავალჯერადი ვიზების ან/და ბინადრობის ნებართვების საფუძველზე შეუძლიათ საქართველოში უვიზოდ შემოსვლა, თუმცა, მათი ვიზის ან ბინადრობის ნებართვას საქართველოს საზღვრის გადაკვეთის დღისთვის, უნდა ჰქონდეს მოქმედების არანაკლებ 1-წლიანი ვადა, რაც უნდა დასტურდებოდეს სამგზავრო ან/და სხვა შესაბამისი დოკუმენტით.
ეს ქვეყნებია: ავღანეთი, ბანგლადეში, განა, ეთიოპია, ერიტრეა, იემენი, კამერუნი, კოტ-დივუარი, კონგო, მაროკო, ნიგერია, პაკისტანი, სომალი, სირია, სუდანი, ტანზანია, უგანდა.
აღნიშნული ქვეყნების მოქალაქეებს ამ დრომდეც ჰქონდათ შესაძლებლობა შემოსულიყვნენ საამიროების, ბაჰრეინის, საუდის არაბეთის, კატარის, ქუვეითის და ომანის ვიზების ან ბინადრობის საფუძველზე, თუმცა არ იყო განსაზღვრული ვიზების/ბინადრობის მოქმედების ვადა და საკმარისი იყო, რომ საზღვრის კვეთის დღისთვის, ვიზა და ბინადრობა მოქმედი ყოფილიყო.
ცვლილება 16 მაისიდან შევა ძალაში.
ცნობისთვის, მოქმედი კანონმდებლობით, საქართველოში უვიზოდ შემოსვლა 94 ქვეყნის მოქალაქეს შეუძლია. თითქმის ყველა მათგანს საქართველოში უვიზოდ შემოსვლისა და სრული 1 წლის ვადით ყოფნის უფლება აქვთ. თუმცა, მაგალითად, ჩინეთის სახალხო რესპუბლიკის მოქალაქეებს საქართველოში უვიზოდ შემოსვლისა და სრული 30 დღის ვადით ყოფნის უფლება, მხოლოდ ტურისტული მიზნებისთვის აქვთ.
Loading ...