Wizz Air-ი აბუ-დაბის მიმართულებით ფრენებს აჩერებს, ფრენები შეწყდება ქუთაისიდანაც

ბაზრის დინამიკის, ოპერაციული სირთულეებისა და ახლო აღმოსავლეთში მიმდინარე რთული გეოპოლიტიკური ვითარების გათვალისწინებით, Wizz Air წყვეტს Wizz Air Abu Dhabi-ის ოპერაციებს, რაც გულისხმობს ყველა ადგილობრივი რეისის შეჩერებას 2025 წლის 1 სექტემბრიდან.
ამის შესახებ ავიაკომპანიის განცხადებაში წერია.

Wizz Air Abu Dhabi-ი ქუთაისიდანაც დაფრინავს. როგორც კომპანიაში BMG-ის უთხრეს ფრენა ქუთაისიდანაც შეჩერდება.

BMG კომპანიის განცხადებას უცვლელად გთავაზობთ:

Wizz Air Abu Dhabi-ს ბოლო ერთ წელიწადში გრძელვადიანი ოპერაციული სირთულეები შეექმნა, მათ შორის:

• ტექნიკური პრობლემები ცხელი და რთული კლიმატური პირობების დროს, რამაც იმოქმედა თვითმფრინავების ხელმისაწვდომობასა და ოპერაციულ ეფექტიანობაზე;

• გეოპოლიტიკური არასტაბილურობა, რამაც გამოიწვია საჰაერო სივრცის დახურვა და რეგიონის მასშტაბით ოპერაციული შეფერხებები, ასევე მომხმარებლის მხრიდან მოთხოვნის შემცირება;

• რეგულატორული ბარიერები, რომლებიც ზღუდავდა კომპანიის შესაძლებლობებს გასულიყო სხვა მნიშვნელოვან ბაზრებზე და გაზრდილიყო.

აღნიშნული ფაქტორები მნიშვნელოვნად ზღუდავს Wizz Air-ის ულტრა-დაბალი ღირებულების მოდელის სიცოცხლისუნარიანობას რეგიონში და შესაძლებლობას, მიაღწიოს მოგებიანობას ევროპულ ოპერაციებთან თანხვედრაში.

Wizz Air გააძლიერებს ფოკუსს თავის ძირითად ბაზრებზე ცენტრალურ და აღმოსავლეთ ევროპაში, ასევე დასავლეთ ევროპულ ქვეყნებში, როგორიცაა ავსტრია, იტალია და გაერთიანებული სამეფო. ამ სტრატეგიული გადანაწილებით კომპანია შეძლებს რესურსების მიმართვას იმ რეგიონებისკენ, რომლებიც გრძელვადიან პერსპექტივაში აჩვენებენ ზრდისა და მოგებიანობის პოტენციალს.

Wizz Air-ის აღმასრულებელმა დირექტორმა, იოზეფ ვარადიმ განაცხადა:
„ეს იყო შესანიშნავი მოგზაურობა ახლო აღმოსავლეთში და ვამაყობთ იმით, რაც შევქმენით. მადლობას ვუხდი ჩვენს ერთგულ თანამშრომლებს თავიანთი დაუღალავი ძალისხმევისა და ერთგულებისთვის WIZZ ბრენდის განვითარებაში ახალ და დინამიკურ ბაზრებზე. თუმცა, საოპერაციო გარემო მნიშვნელოვნად შეიცვალა: გეოპოლიტიკურმა არასტაბილურობამ და ბაზარზე შეზღუდულმა წვდომამ გაართულა ჩვენი საწყისი მიზნების შესრულება. მიუხედავად იმისა, რომ ეს იყო რთული გადაწყვეტილება, არსებული ვითარებიდან გამომდინარე, ეს სწორი ნაბიჯია. ჩვენ გავაგრძელებთ ფოკუსირებას ჩვენს ძირითად ბაზრებზე და ინიციატივებზე, რომლებიც აძლიერებს Wizz Air-ის მომხმარებელთა კმაყოფილებას და ქმნის აქციონერთათვის ღირებულებას.“

მგზავრები, რომლებსაც დაჯავშნილი აქვთ ბილეთები 2025 წლის 31 აგვისტოს შემდეგ, მიიღებენ წერილს ელექტრონული ფოსტით თანხის უკან დაბრუნების ან ალტერნატიული მგზავრობის შესაძლებლობის შესახებ. მომხმარებლები, რომლებმაც ბილეთები შეიძინეს მესამე მხარის მეშვეობით, უნდა დაუკავშირდნენ შესაბამის სააგენტოებს. ზემოაღნიშნული შეჩერება არ ეხება Wizz Air-ის სხვა რეისებს.

www.bm.ge