Washington Post – ირანი რუსეთისთვის იარაღის მიწოდების გაზრდას ფარულად დათანხმდა

ამერიკის შეერთებული შტატებისა და მისი მოკავშირეების ოფიციალური პირების თქმით, ირანი რუსეთისთვის იარაღის მიწოდების გაზრდას უკრაინაზე განსახორციელებელი თავდასხმისთვის ფარულად დათანხმდა.

ინფორმაციას Washington Post-ი ავრცელებს.

გამოცემის ცნობით, ოფიციალური თეირანი რუსეთში რაკეტებისა და უპილოტო თვითმფრინავების გაგზავნას გეგმავს, რომლებიც უკრაინაში, ბრძოლის ველზე გამოსაყენებლადა არის განკუთვნილი.

უშიშროების ოფიციალურმა პირებმა გამოცემას განუცხადეს, რომ ირანის ისლამური რესპუბლიკა ფარულად დათანხმდა მოსკოვთან იარაღის, მათ შორის მოიერიშე თვითმფრინავების მიწოდების გაზრდას.

როგორც Washington Post-ის პუბლიკაციაშია აღნიშნული, აშშ-ის მოკავშირე ერთ-ერთი ქვეყნის დაზვერვა ვარაუდობს, რომ ირანის ოფიციალური პირები მოსკოვს გასულ თვეში ეწვივნენ დამატებითი იარაღის ტრანსპორტირების პირობების საბოლოოდ გასაფორმებლად.