„2018 წლის საპრეზიდენტო და 2016 წლის საპარლამენტო არჩევნებთან შედარებით, შეინიშნება დარღვევების უფრო დიდი რაოდენობა“, – აცხადებს „საერთაშორისო გამჭვირვალობა – საქართველო” (TI), ორგანიზაციის დამკვირვებლების მიერ შეგროვებულ ინფორმაციაზე დაყრდნობით.
TI-ის ხელმძღვანელის, ეკა გიგაურის განცხადებით, დღის მეორე ნახევარში დაფიქსირდა 130-მდე წვრილი და შედარებით სერიოზული დარღვევა და დამკვირვებლებმა დაწერეს 31 საჩივარი.
გამოვლინდა, მაგალითად, შემდეგი სახის ფაქტები:
- ფიზიკური დაპირისპირება და ჟურნალისტის საქმიანობისთვის ხელის შეშლა, ჟურნალისტზე თავდასხმა
გლდანის #39 საჯარო სკოლასთან, სადაც 3 საარჩევნო უბანია განთავსებული, შენობის მიმდებარედ სხვადასხვა პარტიის აქტივისტებს შორის მომხდარი ფიზიკური დაპირისპირებისას, დაზიანდა „ტვ პირველის” ჟურნალისტი ანა ახალაია. ასევე, ონლაინმედია „პუბლიკის” ჟურნალისტს დაუმტვრიეს ტელეფონი – „აღსანიშნავია, რომ ამ სკოლასთან დღის განმავლობაში ფიზიკური დაპირისპირების რამდენიმე ეპიზოდი მოხდა და პოლიციამ რამდენიმე პირი დააკავა“.
- დამკვირვებლების გამოძევება
ხელვაჩაურის #30.83.13 უბანზე ორგანიზაციის დამკვირვებელი არ შეუშვეს, რადგან მან უბნის გარეთ ფოტოები გადაიღო. ამ ფაქტმა კომისიის წევრების გაღიზიანება გამოიწვია.
მარნეულის #13.23.13 დამკვირვებელი არასწორად გააძევეს უბნიდან, ის უღებდა კაბინას ფოტოს გარედან, რადგან 3 ამომრჩეველი იყო ერთდროულად იყო შესული.
- კენჭისყრის ფარულობის დარღვევა
გორის #15.32.67 უბანზე სტაციონარული ვიდეოკამერები ძალიან ახლოს იდგა საარჩევნო კაბინებთან, რითაც ამომრჩევლის ნების კონტროლის საფრთხე იქმნებოდა.
დმანისის #14.24.19 უბნის კაბინიდან გამოსულმა ამომრჩეველმა იქვე მყოფ პირს აჩვენა შემოხაზული ბიულეტენი.
თელავის #10.17.39 უბანზე რამდენიმე ადამიანი კაბინაში მიჰყვებოდა ამომრჩეველს, რაზეც თავმჯდომარე არ რეაგირებდა.
გარდაბნის #13.21.58 უბანზე ერთ-ერთი დამკვირვებელი კაბინაში შეჰყვა ამომრჩეველს და დაეხმარა ბიულეტენის შევსებაში.
ახალქალაქის #18.40.35 უბანზე კომისიის ორმა წევრმა ხმის მიცემის შემდეგ საკუთარ ბიულეტენს კონვერტში ჩადებამდე გადაუღო ფოტო.
- მოსული ამომრჩევლის აღრიცხვა კენჭისყრის შენობაში
გურჯაანის #09.12.02 უბანზე ერთ-ერთი რეგისტრატორი დამკვირვებელს სისტემატურად კარნახობდა მოსული ამომრჩევლის სახელს, გვარსა და პირად ნომერს.
- არაუფლებამოსილი პირების უბანზე ყოფნა
ახალციხის #17.37.29 უბანზე ორგანიზაცია „მწვანე დედამიწის” დამკვირვებლის სტატუსით იმყოფებოდა ახალციხის საკრებულოს წევრი ამბარცუმ ბაბოიანი, საკრებულოს წევრობა შეუთავსებელია დამკვირვებლის სტატუსთან.
- კოვიდუსაფრთხოების ნორმების დარღვევა
მთელი ქვეყნის მასშტაბით კვლავ ბევრ უბანზე არ იცავენ კოვიდუსაფრთხოების წესებს. გარდა ამისა, რუსთავის #12.20.08 უბანზე ნაკადის მომწესრიგებელი ვერ აკონტროლებს რიგს, უბანზე მოქალაქეები ვერ იცავენ დისტანციას.
„საერთაშორისო გამჭვირვალობა – საქართველოს“ ინფორმაციით, დარღვევებს შორის ასევე გამოვლინდა: მარკირების წესების დარღვევა; პირადობის მოწმობის გარეშე ხმის მიცემა; გადასატან ყუთთან დაკავშირებული პრობლემები და, მაგალითად – „გადასატანი ყუთის სიაში რეგისტრირებულმა პირმა საარჩევნო უბანზეც მისცა ხმა და გადასატანი ყუთითაც“.
www.radiotavisupleba.ge
Loading ...