ეროვნული ბანკის პრეზიდენტის მოვალეობის შემსრულებელმა ნათია თურნავამ 19 სექტემბერს საგამონაკლისო ბრძანება გამოსცა და ქართული ბანკებისთვის სანქციათა რეჟიმების შესრულების წესი შეცვალა. ეროვნული ბანკის განმარტებით, საერთაშორისო სანქციები საქართველოს მოქალაქეს მხოლოდ იმ შემთხვევაში შეეხება თუ საქართველოს სასამართლო გამამტყუნებელ განაჩენს გამოიტანს. ბრძანება საკანონმდებლო მაცნეზე უკვე გამოქვეყნდა.
ტაბულა დაუკავშირდა TBC ბანკს იმის გასარკვევად, ეროვნული ბანკის განცხადების შესაბამისად დაუშვებს თუ არა რაიმე გამონაკლისს იმ ადამიანებზე, რომლებზეც აშშ-ის, ევროკავშირისა და გაერთიანებული სამეფოს დაწესებული საერთაშორისო სანქციები ვრცელდება.
TBC-ს წარმომადგენლის თქმით, ბანკი ბანკი საერთაშორისო სანქციების შესაბამისად იმოქმედებს
“TBC რჩება აშშ-ის, გაერთიანებული სამეფოსა და ევროკავშირის სანქციების შესაბამისობაში”. – ამბობს ბანკი.
ტაბულამ იგივე კითხვით მიმართა საქართველოს ბანკსაც, რომლის წარმომადგენელმაც ასევე დაადასტურა, რომ ბანკი არ წავა საერთაშორისო სანქციების წინააღმდეგ.
“ჩვენ ვიცავთ და ვაგრძელებთ ამერიკის და ევროკავშირის მოთხოვნებს სანქციებთან დაკავშირებით”. – ამბობენ საქართველოს ბანკში.
რაც შეეხება ოთარ ფარცხალაძის სანქცირებას, კონფიდენციალური ინფორმაციის დაცვის მიზნით, ბანკს კონკრეტულ პირზე კომენტარი არ გაუკეთებია.
Loading ...
