აშშ-ის პრეზიდენტმა დონალდ ტრამპმა ილონ მასკს შეზღუდვები დაუწესა. მასკს სამინისტროების საკადრო საკითხებზე გადაწყვეტილებების მიღება აღარ შეეძლება. ამის შესახებ ინფორმაციას გამოცემა Politico ავრცელებს.
გამოცემა წერს, რომ ტრამპმა ხუთშაბათს პირადად მოიწვია თავისი კაბინეტი და განუცხადა, რომ ისინი თავად არიან პასუხისმგებლები თავიანთ დეპარტამენტებზე და არა ილონ მასკი. მაღალჩინოსნების თქმით, ტრამპმა ადმინისტრაციას განუცხადა რომ ილონ მასკს უფლება აქვს გასცეს რეკომენდაციები დეპარტამენტებისთვის, თუმცა არ აქვს უფლება ერთპიროვნულად მიიღოს გადაწყვეტილებები პერსონალისა და პოლიტიკის შესახებ.
შეხვედრა მთავრობის ეფექტურობის დეპარტამენტის (DOGE) ხელმძღვანელის, ილონ მასკის მხრიდან საჯარო მოხელეების მასობრივი გათავისუფლების სერიას მოჰყვა, რამაც დიდი გაურკვევლობა შექმნა ფედერალურ მთავრობასა და მის სამუშაო ძალაში. ასევე, DOGE-ის ქმედებებს სასამართლოში სასტიკი წინააღმდეგობა და დემოკრატიული კანონმდებლებისა და ზოგიერთი რესპუბლიკელის კრიტიკა მოჰყვა.
“პრეზიდენტის გზავნილი წარმოადგენს პირველ მნიშვნელოვან ნაბიჯს მასკის მანდატის შესამცირებლად. ტრამპის ახალი მითითებების თანახმად, DOGE-მა და მისმა თანამშრომლებმა უნდა შეასრულონ საკონსულტაციო როლი – მაგრამ კაბინეტის მდივნებმა უნდა მიიღონ საბოლოო გადაწყვეტილებები პერსონალის, პოლიტიკისა და განხორციელების ტემპის შესახებ,” – წერს Politico.
აღნიშნულ შეხვედრას მასკიც ესწრებოდა. მან განაცხადა, რომ ტრამპის დირექტივას ეთანხმებოდა. დამსწრე პირის თქმით, მასკმა აღიარა, რომ DOGE-მა გარკვეული შეცდომები დაუშვა.
ტრამპმა ხაზგასმით აღნიშნა, რომ მას მთავრობაში კარგი ადამიანების შენარჩუნება სურს და არა ქმედუნარიანი ფედერალური მუშაკების მასობრივი განდევნა. ტრამპმა პირობა დადო, რომ მსგავსი შეხვედრები ორ კვირაში ერთხელ გაიმართება.
ამ დროისთვის უცნობია, ტრამპის მითითებების შემდეგ, დააბრუნებენ თუ არა გათავისუფლებულ თანამშრომლებს სამსახურებში.
Loading ...