Pfizer-ის კოვიდსაწინააღმდეგო აბებმა ძლიერ შეამცირა ჰოსპიტალიზების საჭიროება

ახალი კვლევის მონაცემების მიხედვით, Pfizer-ის მიერ წარმოებულმა COVID-19-ის საწინააღმდეგო აბებმა მაღალი ეფექტიანობა აჩვენა პაციენტების ჰოსპიტალიზების საჭიროების შემცირების თვალსაზრისით, მაგრამ შედარებით ნაკლებად გააქრო მსუბუქი სიმპტომები.

Pfizer-ის მონაცემები ორ კვლევას ეფუძნება. ერთ კვლევაში, რომელიც 673 პაციენტის მიერ სიმპტომების თვითმოხსენებას ეფუძნება, მედიკამენტმა, სახელად „პაქსლოვიდი“, ვერ შეამცირა სიმპტომები COVID-19-ის გართულებების რისკის მქონე პაციენტებში. თუმცა, მედიკამენტმა ამ ჯგუფში 70 პროცენტით შეამცირა ჰოსპიტალიზების მაჩვენებელი.

მეორე კვლევაში, მაღალი რისკის მქონე არავაქცინირებულ ადამიანებში მედიკამენტმა 89-პროცენტიანი ეფექტიანობა აჩვენა ჰოსპიტალიზების პრევენციის თვალსაზრისით; პრეპარატს სიმპტომების გამოჩენიდან მაქსიმუმ სამ დღეში იყენებდნენ. შედეგად, დადასტურდა Pfizer-ის წინა კვლევა, რომელიც პაციენტთა მცირე ჯგუფზე ჩატარდა.

როგორც შედეგები მიუთითებს, სავარაუდოა, რომ ეს აბები სტანდარტული სამკურნალო საშუალება გახდება დაავადების გამწვავების რისკის მქონე კოვიდპაციენტებში. თუმცა, უფრო ჯანმრთელ პაციენტებში მიღებული შერეული მონაცემები აჩვენებს, რომ უფრო მეტი კვლევაა საჭირო, ვიდრე ის სტანდარტული წამალი გახდება ვაქცინირებული პირებისთვის, რომლებსაც დაავადება დისკომფორტს უქმნის, მაგრამ არა სასიცოცხლო საფრთხეს.

Pfizer-ის ხელმძღვანელის, ალბერტ ბურლას განცხადებით, შედეგები ხაზს უსვამს, რომ მედიკამენტის ამ კანდიდატს აქვს პოტენციალი, მთელ მსოფლიოში გადაარჩინოს პაციენტთა სიცოცხლე. მისივე თქმით, დამტკიცების შემთხვევაში, ეს პოტენციური მედიკამენტი კრიტიკულად მნიშვნელოვანი იარაღი გახდება პანდემიის დასასრულებლად.

Pfizer-ის განცხადებით, როგორც მოსალოდნელიც იყო, ლაბორატორიული ტესტები მიუთითებს, რომ პაქსლოვიდი აქტიურობას ინარჩუნებს ომიკრონ ვარიანტის წინააღმდეგ. პრეპარატი მიზანში იღებს შიდა ცილას, სახელად პროტეაზას, რომელიც ვარიანტებს შორის დიდი მუტაციებით არ გამოირჩევა. შედარებისათვის გეტყვით, რომ ვაქცინა მიზანში იღებს ე. წ. წვეტ (სპაიკ) ცილას, რომელიც ომიკრონში ძლიერ მუტირებულია და სამომავლო ვარიანტებში შეიძლება კიდევ უფრო მეტად შეიცვალოს.

მონაცემები აშკარა ჩანს მაღალი რისკის მქონე არავაქცინირებულ ადამიანებში. მარეგულირებელთა მიერ დამტკიცების შემთხვევაში, მედიკამენტი შეიძლება მაშინვე დაინერგოს ასეთ პაციენტებში მოსახმარებლად, როგორც კი Pfizer-ი მისი დიდი რაოდენობით წარმოებას შეძლებს.

მომზადებულია bloomberg.com-ის მიხედვით.

www.1tv.ge