ამერიკულ დაზვერვას აქვს ინფორმაცია რუსეთის პრეზიდენტ ვლადიმირ პუტინის ავადმყოფობის და მასზე თავდასხმის მცდელობის შესახებ. ამას ამერიკული გამოცემა Newsweek-ი წერს სამ წყაროზე დაყრდნობით. გამოცემის თანახმად, სამივე იცნობს ამერიკული დაზვერვის საიდუმლო მოხსენებას, რომელიც პრეზიდენტის ადმინისტრაციისთვის მაისში მომზადდა. ანგარიშის თანახმად, პუტინმა, სავარაუდოდ, პროგრესირებადი კიბოს გამო, აპრილში გაიარა მკურნალობის კურსი და საჯაროდ ამის შემდეგ გამოჩნდა, მასზე თავდასხმის მცდელობა კი, მარტში იყო.
ამერიკული დაზვერვის ერთ-ერთი მაღალჩინოსნის შეფასებით, პუტინის ძალაუფლება ძლიერია, თუმცა, უკვე აღარ არის აბსოლუტური, კრემლის შიგნით ბრძოლა ასეთი ინტენსიური არასდროს ყოფილა და ყველა გრძნობს, რომ დასასრული ახლოსაა.
Newsweek-ის წყაროთა თანახმად, რუსეთის პრეზიდენტი სულ უფრო ღრმად შედის ძალაუფლებასთან დაკავშირებულ პარანოიაში, რაც არაპროგნოზირებადს ხდის მის შემდგომ მოქმედებას უკრაინაში. ამასთან, პუტინის იზოლაციის გამო, ამერიკული დაზვერვისთვის რთულია რუსეთის პრეზიდენტის და მისი ჯანმრთელობის მდგომარეობის ზუსტად შეფასება.
სტატიის გამოქვეყნების შემდეგ, Newsweek-მა აშშ-ის ეროვნული უსაფრთხოების საბჭოდან მიიღო განცხადება, რომლის თანახმად, ცნობები, რომ ამერიკულ დაზვერვას მსგავსი შეფასებები აქვს და ამას პრეზიდენტიც გაეცნო, სიმართლეს არ შეესაბამება.
პუტინის მძიმე დაავადების და მასზე წარუმატებელი თავდასხმის შესახებ, მაისის შუა რიცხვებში, საკუთარ წყაროებზე დაყრდნობით განაცხადა უკრაინის თავდაცვის სამინისტროს დაზვერვის სამმართველოს ხელმძღვანელმა კირილ ბუდანოვმაც. მსგავს ცნობებს ჭორები უწოდა რუსეთის საგარეო საქმეთა მინისტრმა სერგეი ლავროვმა.
www.radiotavisupleba.ge
Loading ...