გამოკითხულთა 76 პროცენტისთვის მისაღებია საქართველოს ევროკავშირში გაწევრიანება, – ამის შესახებ ამერიკის ეროვნულ-დემოკრატიული ინსტიტუტის (NDI) კვლევაშია ნათქვამი.
კითხვაზე, მისაღებია თუ არა საქართველოს მთავრობის გაცხადებული მიზანი – საქართველო გახდეს ევროკავშირის წევრი, გამოკითხულთა 76 პროცენტი აცხადებს, რომ მისაღებია, 11 პროცენტი აცხადებს, რომ მიუღებელია, 13-მა პროცენტმა კი არ იცის.
რაც შეეხება ნატო-ში გაწევრიანებას, კითხვაზე, მისაღებია თუ არა საქართველოს მთავრობის გაცხადებული მიზანი – საქართველო გახდეს ნატო-ს წევრი, გამოკითხულთა 74 პროცენტი აცხადებს, რომ მისაღებია, 11 პროცენტისთვის მიუღებელია, 14-მა პროცენტმა კი არ იცის.
NDI-ს კვლევა საქართველოს მთლიანი მოსახლეობის წარმომადგენლობითია (ოკუპირებული ტერიტორიების გამოკლებით). გარდა ამისა, კვლევა წარმომადგენლობითია თბილისის, ურბანული და სოფლის ტიპის დასახლებებისთვის. ინტერვიუები ჩატარდა ქართულ, აზერბაიჯანულ, სომხურ და რუსულ ენებზე. ყველა ინტერვიუ ჩატარდა სატელეფონო გამოკითხვის მეთოდით. საველე სამუშაოების პერიოდი 13-25 ივლისია, რა დროსაც ჩატარდა 2 016 დასრულებული ინტერვიუ (23% გამოპასუხება, AAPOR სტანდარტების მიხედვით). საშუალო ცდომილების ზღვარი +/- 1.3%. ამასთან, ცდომილების ზღვარი იცვლება სხვადასხვა კითხვის მიხედვით. NDI-ში ამბობენ, რომ ინტერვიუს მეთოდის ცვლილება შესაძლოა ცდომილებაზე აისახოს.
Loading ...
