NATO-ს წარმომადგენელი: რუსებს აკლიათ საწვავი, წინ ნელა მიიწევენ, მორალი ეცემა

NATO-ს ერთერთი სამხედრო თანამდებობის პირი CNN-თან ამბობს, რომ უკრაინაში შეჭრის პროცესი რუსეთმა მოლაპარაკებებისთვის დროის მოსაგებად შეანელა.

“მათ პრობლემები აქვთ” – უთხრა CNN-ს NATO-ს წარმომადგენელმა, დაზვერვის უახლეს მონაცემებზე დაყრდნობით, – “მათ არ აქვთ საკმარისი დიზელი, ისინი ძალიან ნელა მიიწევენ წინ და მორალის საკითხიც პრობლემურია”.

კითხვაზე, შესაძლოა თუ არა, რომ რუსებმა მეტი ინტენსივობით განაგრძონ თავდასხმა, NATO-ს წარმომადგენელმა CNN-ს უთხრა, რომ “მათ ეს უნდა გააკეთონ, რადგან განრიგს მნიშვნელოვნად ჩამორჩნენ. მათ ყველაფერი ხელიდან ეცლებათ, ყოველი დღე მათთვის უკიდურესად მტკივნეულია”.

27 თებერვალს რუსეთის თავდაცვის სამინისტრომ რუს სამხედროებს მითითება მისცა, განეგრძოთ შეტევა “ყველა მიმართულებით”, მას შემდეგ, რაც უკრაინის ხელისუფლებასთან მოლაპარაკებების დაწყების საკითხი ჩავარდა. სამინისტროს თქმით, თავდასხმა მოლაპარაკებებზე უკრაინის ხელისუფლების უარის შემდეგ განახლდა.

პრეზიდენტ ზელენსკის მრჩეველმა უარყო რუსეთის თავდაცვის ბრალდება და განაცხადა, რომ მოლაპარაკებების დაწყებაზე უარი უკრაინას არ უთქვამს.